«Կորոնավիրուսի դեմ պայքարի հաջողության պատմություն. Վրաստան» վերնագրով հոդված է տպագրել The Washington Times-ը, որտեղ Վրաստանի օրինակն ամենատպավորիչն է անվանում:
Հոդվածը սկսվում է համաշխարհային վիճակագրությամբ: Նշված են այն երկրները, որոնք ամենաշատն են տուժել կորոնավիրուսից՝ ԱՄՆ, Իսպանիա, Իտալիա, Ֆրանսիա եւ այլն:
«Սակայն լրատվամիջոցների ուշադրությունից դուրս մնացին COVID-19-ի դեմ պայքարի հաջողված պատմությունները, որոնցից ամենատպավորիչը Վրաստանի օրինակն է: Երկիրը գտնվում է Թուրքիայի և Ռուսաստանի միջև, նրա բնակչությունը 3,75 միլիոն է: Հոդվածի հրապարակման ժամանակ Վրաստանում կորոնավիրուսից մահացել է 5 մարդ: Այո, ճիշտ եք կարդացել՝ հինգ», – գրված է հոդվածում:
Պարզելու համար, թե ինչպես է Վրաստանը կարողացել նման արդյունքների հասնել, The Washington Times-ը զրուցել է փոխվարչապետ, տարածքային զարգացման և ենթակառուցվածքների նախարար Մայա Ցկիտիշվիլիի հետ:
«Մենք ի սկզբանե մենք շատ լուրջ ընդունեցինք այս մարտահրավերը: Առաջին հերթին մենք շատ շուտ միջոցներ ձեռնարկեցինք, երկրորդ` շատ ուշադիր լսեցինք առողջապահության մասնագետներին: Մենք բավականին ուշադիր էինք հասարակության հետ շփման ընթացքում: Եվ, հավանաբար, ամենակարևորը, որ մենք այդ ամենն արել ենք վրաց ժողովրդի հետ միասին», – ասել է Ցկիտիշվիլին:
Նա շեշտել է այն պատասխանատվության կարևորությունը, որով բնակչությունը հաշվի առավ և հետևեց կառավարության առաջարկներին:
«Մեր քաղաքացիները շատ պատասխանատու են, և միասին մենք կդիմագրավենք այս վիրուսին», – ասել է Ցկիտիշվիլին:
Կառավարության stopcov.ge կայքում հրապարակված վերջին տվյալների համաձայն՝ Վրաստանում COVID-19 է ախտորոշվել 416 մարդու մոտ, երկրի երեք քաղաքացի բուժման համար Վրաստան է տեղափոխվել այլ երկրներից, ապաքինվել է 107 հիվանդ, հինգը մահացել են: 573 հիվանդանոցներում բժիշկների հսկողության ներքո մեկուսացված է 5 148 մարդ:
Երկրում գործում է արտակարգ դրություն, պարետային ժամ է գործում 21:00-ից 06: 00-ն:
