Թուրքական Hürriyet Daily News and Economic Review թերթում հրապարակվել է Ֆուլյա Օզերքանի «Հայաստանի հետ վստահության քայլեր են ծրագրված» խորագրով հոդվածը, որում ասվում է.
«Թուրքիան պլանավորում է ներկայացնել նոր միջոցների փաթեթ, որը միտված է հարևան Հայաստանի հետ հարաբերությունների կարգավորման շրջանակներում վստահության ամրագրմանը։ Հայաստանի կառավարությանը մոտ կանգնած աղբյուրները հայտնում են, որ Թուրքիան իրականանցնելու է «փոքր, խորհրդանշական քայլեր, որոնք դուրս են գալիս եկեղեցիների վերանորոգման շրջանակներից»։
Թուրքական կողմն այդպիսով ցանկանում է դրական ազդանշան ուղարկել Հայաստանին։ Այդպիսի միջոցների մեկն էլ ենթադրում է Երևանում բացել Turkish Airlines (THY, Թուրքական ավիաուղիներ) ազգային փոխադրողի գրասենյակ։
Աղբյուրներից մեկը նշել է. «Դա դեռ վերջնական որոշում չէ, սակայն այն լուրջ ուշադրության է արժանացել»։ Դրա իմաստը կայանում է նրանում, որ հայերին ու Հայկական սփյուռքի ներկայացուցիչներին օգնի ավելի շատ բան իմանալու Ստամբուլի ու ժամանակակից Թուրքիայի մասին՝ Երևանից THY-ի միջոցով շրջելով նորաբաց Լոս Անջելես-Ստամբուլ ուղիղ չվերթներով։ Աղբյուրները նշում են, որ հնարավոր է դա օգնի նաև նոր շուկաների բացմանը, քանի որ իրանցիները թռչելու են Երևան, ապա՝ Ստամբուլ։
Turkish Airlines ընկերությունը Թուրքիայի արտաքին քաղաքականությունում ունի նաև խորհրդանշական նշանակություն։
Աղբյուրը հայտնում է, որ երկրորդ պլանը ենթադրում է նոր չարտերային չվերթներ բացել Թուրքիայի արևելյան հատվածում գտնվող Վանի ու Երևանի միջև, ինչը պահանջում է Հայաստանի մայրաքաղաքի օդանավակայանի արդիականացումը։ Երկու պլաններն էլ իրագործվելու են մոտ ժամանակներս։
Կա գաղափար՝ Թուրքիայի կրթության նախարարության աշխատակիցները տարածաշրջանային տուրի շրջանակներում, Վրաստանի կրթության նախարարին այցելելուց բացի, կարող են այցելել նաև Հայաստան։
Աղբյուրներից մեկը նշում է. «Մենք ոչինչ չենք տեսնի մինչև 2013 կամ 2014 թվականը, քանի որ թուրքական կառավարությանը, կարծես թե, ժամանակ է անհրաժեշտ՝ տարածաշրջանային այլ խնդիրներ լուծելու համար, նախքան հայկական հարցին վերադառնալը»։
Թուրքիան ներկայումս արտաքին քաղաքական դաշտում բախվում է բազմաթիվ այժմեական խնդիրների, որոնց թվում են մոտ 10,000 սիրիացի փախստականների խնդիրը, Լիբիայի ճգնաժամը, Իսրայելի հետ խնդրահարույց հարաբերությունները, Կիպրոսի փակուղին ու քրդական հարցը։ Այս բոլոր խնդիրներն ավելի առաջնահերթ են, քան՝ հայկական հարցը։
Չնայած այդ բոլոր մարտահրավերներին՝ թուրքական կողմը նախորդ շաբաթ ցույց տվեց Հայաստանի հետ հարաբերությունների կարգավորման հարցում իր պատրաստակամությունը՝ հայտարարելով, որ ԱՄՆ պետքարտուղար Հիլարի Քլինթոնի այցը կդնի այդ գործընթացի հիմքը։
Աղբյուրներից մեկը հայտնում է. «Հայ-թուրքական հարաբերությունների կարգավորման գործընթացում ամերիկացիները՝ որպես երրորդ երկիր, նույնպես ցանկանում են խաղալ ավելի անմիջական դեր»՝ ընդգծելով, որ Շվեյցարիայի միջնորդությունը նույնպես շարունակվում է։
Թուրքիան ու Հայաստանը 2009 թվականին ստորագրեցին հարաբերությունների կարգավորման ցյուրիխյան արձանագրությունները։ Այդ պահից ի վեր՝ բանակցությունները մի շարք պատճառներով փակուղի մտան, սակայն համաձայն պլանների՝ երկու կողմն էլ իրագործում են արձանագրությունների գաղափարները՝ առանց դրանք երկու երկրների խորհրդարաններում ընդգրկելու։
Աղբյուրներից մեկը նշում է. «Գաղափարը կայանում է ոչ թե սահմանների բացման, այլ՝ Թուրքիայի ու Հայաստանի միջև սահմանների հատման բաց լինելու մեջ։ Դա երրորդ կողմի միջնորդության առարկան է՝ գաղտնի դիվանագիտություն։ Տվյալ պահին հայկական կողմը երկու ուղերձ է հղել Թուրքիային. ա) «Մենք սպասում ենք Թուրքիայի քայլերին», բ) «Հայկական համբերությունը չի կարող հավերժ տևել»։ Հենց այդ տեսանկյունից էլ վստահության ձևավորումն ունի այդպիսի կարևորություն»։
