Կրծքի սիլիկոնային իմպլանտները փրկել են կանադացի կնոջ կյանքը, հաղորդել են տեղի կլինիկաներից մեկի վիրաբույժները: Անսովոր դեպքը նրանք նկարագրել են Plastic Surgery Case Studies ամսագրում հրապարակված հոդվածում:
30-ամյա կանադուհին Տորոնտոյի փողոցներից մեկով քայլելիս հանկարծակի այրոց և ցավ է զգացել կրծքավանդակի շրջանում: Տեսնելով, որ արնահոսում է, նա շտապել է մոտակա հիվանդանոց, որտեղ բժիշկները հրազենային վնասվածք են ախտորոշել և հիվանդին տեղափոխել համապատասխան բաժին:
Փամփուշտը խրվել էր կնոջ կրծքավանդակի ստորին աջ հատվածում, այն անցել էր ձախ իմպլանտով, շրջել աջը և կոտրել աջ կողը:
Իմպլանտները հեռացնելուց և վերքը ախտահանելուց հետո բժիշկներն ապահովության համար հակաբիոտիկներ են նշանակել կնոջը: Նա բավականին արագ ապաքինվել է՝ առանց որևէ բարդության:
Բժիշկները նշել են, որ իմպլանտների բացակայության դեպքում իրավիճակը կարող էր շատ ավելի վատ լինել. հաշվի առնելով փամփուշտի հետագիծը, այն կարող էր խոցել սիրտը, և կինը տեղում կմահանար:
Հեղինակները նշում են, որ սա բժշկական գրականության մեջ նկարագրված առաջին նման դեպքը չէ:
Բժիշկները հիվանդին խորհուրդ են տվել առաջիկա վեց ամիսների ընթացքում նոր իմպլանտներ չտեղադրել: Իսկ ով է կրակել կնոջ ուղղությամբ՝ պարզել չի հաջողվել, ոստիկանությունը չի կարողացել հայտնաբերել հանցագործի հետքերը:
