Սերժ Սարգսյանը պատասխանելով ապրիլյան քառօրյա հանձնաժողովի անդամների հարցերին, համաձայնել է, որ Զինված ուժերի գլխավոր շտաբի նախկին պետ Յուրի Խաչատուրովի հանձնաժողով չգալը եղել է սխալ և ինքը հորդորել է Խաչատուրովին, որ ճիշտը գնալն է: Խաչատուրովի հանգամանքը անշուշտ առանցքային նշանակություն ունի ամբողջ համատեքստում, թե այն պատճառով, որ նա եղել է առանցքաին զինվորականը՝ թիվ մեկ զինվորականը, թե այն պատճառով, որ Յուրի Խաչատուրովը եղել է անձ, որը Մոսկվայում ՌԴ միջնորդությամբ բանակցել է Ադրբեջանի ԶՈՒ շտաբի պետի հետ՝ հրադադարի շուրջ:
Սերժ Սարգսյանը օրերս ցուցադրված մի փաստագրական ֆիլմում նշել էր, որ Յուրի Խաչատուրովը բանակցության ընթացքում հեռախոսով կապվել է իր հետ և ներկայացրել իրավիճակը, հեռանկարները, և ստանալով ցուցումներ՝ ի վերջո պայմանավորվել հրադադարի շուրջ: Չորս տարի առաջ՝ ապրիլյան քառօրյայից ամիսներ անց, Դմիտրի Կիսելյովի հետ հարցազրույցում Սերժ Սարգսյանը նշել էր, որ տեղյակ չի մանրամասներից, թե ինչ է քննարկվել Մոսկվայում՝ հրադադարի շուրջ բանակցությունում: Սարգսյանի այդ ակնարկները գործնականում այն մասին են, որ առնվազն մտորելու տեղ կա՝ Յուրի Խաչատուրովը արդյո՞ք ամենայն մանրամասնությամբ է ներկայացրել Մոսկվայում բանակցության ընթացքը, թե՞ կարող էր որոշակի իրողություններ թաքցնել Սերժ Սարգսյանից, նրան այսպես ասած ապակողմնորոշելով և ըստ այդմ անհրաժեշտ որոշումը ստանալով՝ Մոսկվայի համար անհրաժեշտ:
Իսկ Մոսկվայի համար իհարկե անհրաժեշտ էր շոտափույթ ձևով կանգնեցնել պատերազմը, քանի որ Ադրբեջանի բլից կրիգը հայկական կողմը տապալել և հակագրոհի էր անցել առանց Մոսկվայից օգնություն խնրելու: Իսկ այդ իրավիճակում Մոսկվան արդեն ինքն էր կանգնում լրջագույն դիլեմայի առաջ, քանի որ հայերին չօգնելը դառնում էր արդեն Ադրբեջանին բացահայտ աջակցության դրսևորում: Մինչդեռ, մի բան է ստիպված լինել օգնել հայերին, մեկ այլ բան, երբ օգնում է հայերին այն բանից հետո, երբ ստանում է օգնության խնդրանք: Այդ ամենը կարևոր դրվագներ են տեղի ունեցածի ոչ միայն ռազմական, այլև ռազմա-քաղաքական պատկերը ստանալու համար: Իսկ դա իր հերթին կարևորագույն խնդիր է Հայաստանի անվտանգային ռազմավարության հետագա արդյունավետության համար, որովհետև մարտահրավերները Հայաստանի համար կրելու են պարբերական բնույթ, քանի դեռ մենք ապրում ենք ռեգիոնում, որտեղ առանցքային խաղացող են Թուրքիան և Ռուսաստանը, ու քանի դեռ նրանք միմյանց հետ խաղում են դեռևս 100 տարի առաջ հայերի կյանքի հաշվին կնքված համաձայնագրի կանոնների հանդեպ հավատարմությամբ: Այդ տեսանկյունից, Յուրի Խաչատուրովի հանձնաժողով գնալը դառնում է ինդիկատոր, թե ապրիլյան պատերազմում ՀՀ ԶՈՒ գլխավոր շտաբի պետի կարգավիճակում ու՞մ կողմից էր խաղում Յուրի Խաչատուրովը:
Լուսանկարը՝ Armeniasputnik-ի
