Ինչպես ամբողջ աշխարհում, այնպես էլ Հայաստանում լիարժեք բնականոն կյանքին վերադառնալու ժամկետներ չեն նշվում, բայց որոշ քայլեր են ձեռնարկվում, որոնք վկայում են կյանքի ռիթմը չկորցնելու համարձակության մասին: Հայաստանում եթե համաճարակի վիճակագրության ներկայիս դինամիկան պահպանվի, պարետատունը հաջորդ շաբաթ ևս տնտեսական որոշ սահմանափակումներ կհանի:
Թեմայի շուրջ «Առաջին լրատվական»-ի հետ քննարկմանը մասնակցեցին կառավարման փորձագետ Սերոբ Անտինյանը, ԱԺ «Իմ քայլը» խմբակցության պատգամավոր Ռուստամ Բաքոյանը և «Քաղաքացու որոշում» կուսակցության գործադիր մարմնի անդամ Գոռ Հակոբյանը:
Սերոբ Անտինյանի դիտարկմամբ՝ կառավարությունը որդեգրել է արդյունավետ հակազդման քաղաքականություն, և դա արդեն արդյունքներ է տալիս. «Ունենք կորոնավիրուսով վարակվածության դեպքերի ավելի նվազ դինամիկա: Այս ամենը երկսայր սուր է. մի կողմից՝ պետությունը տնտեսական սահմանափակումների քաղաքականություն է վարում, ինչը նպաստում է առողջության պահպանմանը, առողջապահական համակարգին հնարավորություն տալով ավելի համարժեք պատասխան տալու իրավիճակին, մյուս կողմից՝ տնտեսությունը կանգ է առել: Տնտեսությունը պետք է աշխուժանա, տնտեսական հարաբերությունները պետք է մտնեն բնականոն հուն, այլապես այս վիճակը չի կարող երկար ձգվել: Պետք է գտնել ոսկե միջինը»:
«Կառավարությունն անում է այն, ինչ կարող է»,- նշեց Գոռ Հակոբյանը՝ հավելելով, որ փոփոխություններ կլինեն՝ վիրուսների ու համաճարակների դեմ պայքարը դառնալու է անվտանգության բաղադրիչ մաս, և պետությունն ու հասարակությունը պետք է դրան պատրաստ լինեն: Առայժմ այդ հեռանկարը չեմ տեսնում, դեռևս կարճաժամկետ լուծումներ են տրվում»:
Ռուստամ Բաքոյանի խոսքով՝ այն, ինչ անում է կառավարությունը, սեփական ուժերի վրա է հիմնված եղել, և քանի որ ամբողջ աշխարհն է այս իրավիճակում, յուրաքանչյուր երկիր իր տնտեսությունը փորձում է վերականգնել սեփական ռեսուրսներով: Առաջին հերթին մեր հույսը մեր սեփական ռեսուրսների վրա պետք է դնենք, բայց նաև եթե հնարավոր է, պետք է փորձենք միջազգային կառույցներից աջակցություն ստանալ:
Սերոբ Անտինյանը հավելեց, որ աջակցություն կարելի է ստանալ տարբեր տեղերից, կարևորն այն է, թե ինչ ռազմավարություն է մշակում, և ստացված գումարներն ինչ ուղղությամբ կծախսվեն: Պետք է փաստենք, որ աշխարհը բացարձակապես նոր իրավիճակի հետ է առնչվել և պատրաստվում է փոխվել:
«Մենք դեռ լուրջ վտանգի փուլում ենք գտնվում»,- նշեց Ռուստամ Բաքոյանը՝ հավաստիացնելով, որ Ապրիլի 24-ին տեղի կունենան միայն արարողակարգային միջոցառումներ:
Մանրամասն՝ տեսանյութում:
