Ազգային ժողովն այսօր արտահերթ նիստում քննարկեց արտակարգ դրության ռեժիմը 30 օրով երկարաձգելու վերաբերյալ կառավարության նախագիծը: Նախագծի համաձայն՝ արտակարգ դրության այս փուլն ավելի մեղմ կլինի՝ ի տարբերություն նախորդի: Արդյո՞ք դա նշանակում է, որ համաճարակից բխող բոլոր ռիսկերն են կառավարելի:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ ԲՀԿ խմբակցության պատգամավոր Սերգեյ Բագրատյանը, «Լուսավոր Հայաստան» խմբակցության պատգամավոր Կարեն Սիմոնյանը և ԱԺ «Իմ քայլը» խմբակցության պատգամավոր Վաղարշակ Հակոբյանը:
Սերգեյ Բագրատյանի խոսքով՝ կառավարությունը արտակարգ դրության ռեժիմը երկարաձգեց մինչև մայիսի 14-ը՝ հիմք ընդունելով այն հանգամանքը, որ որոշակիորեն կայուն իրավիճակ է, սակայն չեն բացառվում երկրորդ էտապը կամ նոր զարգացումները: «Կայունացման ընթացքին պետք է հետևենք, որ վարակի տարածման գործակիցը նվազի և կայունանա: Մենք դիլեմայի առջև ենք՝ առողջությո՞ւն, թե՞ տնտեսություն, առողջությունը պահելու դեպքում տնտեսությունն ենք կորցնում, տնտեսությունը պահելու դեպքում առողջությունն ենք կորցնում, ո՞րն ընտրել: Կառավարությունների որոշման հետևանքով կարող ես երկուսն էլ կորցնել, կամ մեկը կորցնել, մյուսը՝ պահել, բայց ի վերջո սրանք փոխազդեցության մեջ են, այսինքն՝ եթե անընդհատ հիվանդությունը զարգանա, և անընդհատ աշխատեն, ի վերջո այդ հիվանդությունը բոլորին կվարակի… Հիվանդ հասարակությունը առողջ տնտեսություն կարո՞ղ է զարգացնել, այսպիսի հարցեր են առաջանում: Այս իրավիճակն աննախադեպ է…»,- նկատեց Ս. Բագրատյանը:
Վերահսկել համաճարակը, փրկել տնտեսությունը. այս բևեռների շուրջ ԱԺ-ում ծավալված քննարկման վերաբերյալ իր դիտարկումները ներկայացրեց Վաղարշակ Հակոբյանը՝ վստահեցնելով, որ կառավարության կողմից բանաձևերը ընտրվում են միմիայն վերլուծությունների հիման վրա:
Կարեն Սիմոնյանի դիտարկմամբ՝ հարցին պետք է մոտենալ երեք տեսանկյուններով՝ «քաղաքական, սոցիալական և տնտեսական… Նրա կարծիքով՝ պետք է ավելի երկարատև ռազմավարություն ունենալ:
Մանրամասն՝ տեսանյութում:
