«Հանուն կայուն մարդկային զարգացման» ասոցացիայի նախագահ, աշխարհագրական գիտությունների թեկնածու Կարինե Դանիելյանը այսօր լրագրողների հետ հանդիպմանը իր մտահոգությունը հայտնեց՝ կապված Աբովյան քաղաքում հանքավայրի շահագործման հետ: Հրազդան քաղաքի պարագայում ներկայացնելով քաղաքի առանց այն էլ աղտոտված վիճակը՝ նա ասաց, որ դրան կգումարվի նաև տոքսիկ, ծանր մետաղներով հագեցած օդը, Դանիելյանը հույս հատնեց, որ 600 հրազդանցիների նամակները, ուղված հասարական կազմակերպություններին, հանրային խորհրդին, անպատասխան չեն մնա:
Հրազդանի պարագայում լրացուցիչ աղտոտվածություն կլինի, քանի որ Երևանը կարող է կորցնել իր խմելու ջրի 40 տոկոսը: Ինչպես կարելի է տուրիզմ, մաքուր գյուղատնտեսություն զարգացնել այս պարագայում»,- ասաց Կ.Դանիելյանը: Նա բերեց Տաթևի վանքի կողքին հանքավայրի շահագործման օրինակը` ընդգծելով, որ եկել ենք այն սահմանին, որ առնչվում ենք ազգային անվտանգության խնդրին: Նա անդրադարձ կատարեց Ջերմուկից ոչ հեռու գտնվող ուրանի հնարավոր հանքավայրի շահագործման փաստին` նշելով, որ առայժմ պարզ չէ՝ ունե՞նք պաշարներ, թե՞ ոչ, քանի որ պետք է լինի ուսումնասիրության երկրորդ փուլ: Պարզ չէ, թե դա ինչ կերպ կազդի հանքային ջրերի բաղադրության վրա:
Դանիելյանը անդրադարձավ նաև Սևանի ավազանի մաքրման աշխատանքներին՝ ուրախությամբ նշելով, որ այդ հարցում բավական լավ արդյունքներ են գրանցվել: Նա տեղեկացրեց նաև, որ իրենց հաջողվել է լուծել Խոսրովի անտառի հետ կապված հարցը: Կառավարությունը վերանայել է 2008 թվականի իր որոշումը: Նա առաջարկեց նաև վերանայել կամ առնվազն հինգ տարով դադարեցնել հանքավայրերի շահագործման լիցենզիաները. «Կան շուրջ 450-460 լիցենզիաներ, շուրջ 370-ը ընթացքի մեջ է: Մի փոքր կտոր աշխարհը, որ մեզ տրված է, ծածկում ենք խոցերով»:
