Հեղափոխության առաջին օրերից քաղաքացիական հասարակությունը ներկայիս իշխանության թև ու թիկունք էր: Արդյո՞ք այսօր խզվել է կապը իշխանության և քաղհասարակության միջև: «Առաջին լրատվական»-ի հետ զրույցում այս և մի շարք այլ հարցերի շուրջ իրենց դիտարկումները ներկայացրին իրավապաշտպաններ Զարուհի Հովհաննիսյանը և Նինա Կարապետյանցը:
«Քաղհասարակությունը միշտ կատարում է իր դերը՝ հանրային վերահսկողություն և մշտադիտարկում,- նշեզ Զ. Հովհաննիսյանը:- Հանրային վերահսկողություն և մշտադիտարկում արվել է և՛ նախկինում, և՛ այժմ է կատարվում: Եթե քաղհասարակությունը նկատի խնդիրներ և չբարձրաձայնի, այլ լռի, ուրեմն իր տեղում չէ, վերացած է: Մենք, որպես հասարակություն, իրավունք չունենք թույլ տալ սիստեմի շարունակականությունը և չմտածել սիստեմի խնդիրների լուծման և փոփոխությունների մասին: Շատ կարևոր է, որ քաղհասարակությունը շարունակի իր մտորումը այս հարցերի վերաբերյալ:
Քաղհասարակությունը միատարր չէ, այստեղ էլ կան շատ «էլիտար» խմբեր, որոնք հակված են մտածելու, որ բարձր աշախատավարձ պետք է ստանան այն մարդիկ, ովքեր կրթություն են ստացել հեղինակավոր բուհերում և բանի տեղ չդնել այն մարդկանց, ովքեր հնարավորություն չեն ունեցել կրթություն ստանալու: Սակայն եթե այդ չափանիշներով առաջնորդվենք, ուրեմն խեղում ենք սոցիալական արդարության և հավասարության պատկերացումը և մտնում կապիտալի կեղեքիչ սիստեմի մեջ: Համաշխարհային կտրվածքով լուրջ իրավիճակում ենք գտնվում, և եթե այսօր կառավարությունները, տնտեսական գործիչները, որոշումներ կայացնողները, քաղաքական գործիչները չմտածեն փոփոխության մասին, վաղը ուշ է լինելու, և ալիքը գալու է սրբի-տանի իրենց նույնպես, ու կանգնելու են կրախի առաջ»:
Նինա Կարապետյանցի խոսքով՝ իշխանության մեջ գտնվում են մարդիկ, ովքեր հենց քաղհասարակությունից են դուրս եկել, կրթվել, կայացել են հենց քաղհասարակության մեջ և մարդու իրավուքների, ժողովրդավարության ջատագովն են եղել: «Իսկ այժմ, այո՛, խզվել է քաղհասարակության և իշխանության միջև կապը: Քաղհասարակությանը դիմում են միայն այն դեպքում, երբ աջակցության կարիք ունեն, իսկ երբ իրենց ճանապարհին ոչ համարժեք գնահատական ես տալիս, ուղղակի քիչ է մնում դավաճան համարեն, հակահեղափոխական են համարում և մեղադրում «մերժվածների վարքագիծ» դրսևորելու մեջ: Բայց մերժվածների քննադատությունը ուրիշ կատեգորիա է, իսկ այն, ինչի մասին մենք ենք խոսում, բոլորովին ուրիշ»,- նշեց իրավապաշտպանը:
Մանրամասն՝ տեսանյութում:
