Սերժ Սարգսյանի գրասենյակը գրություն է ուղարկել, համաձայն որի նա պատրաստ է ներկայանալ Քննիչ հանձնաժողովի նիստին ապրիլի 16-ին. իհարկե նախապայմաններ կային ներկայանալու համար, սակայն իրականում այդ նախապայմաններն ի սկզբանե գոյություն չունեին, որովհետև դրանք ստեղծված են բոլոր այն անձանց համար, որոնք եկել և ներկայացել են հանձնաժողովին, համապատասխան բացատրություններ են արել ու գնացել: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արմեն Խաչատրյանը:
Դիտարկմանը, որ Սերժ Սարգսյանի գրասենյակը բավարար չէր համարել հանձնաժողովի պատասխանը, պատգամավորն արձագանքեց. «Սերժ Սարգսյանի գրասենյակը ևս մեկ անգամ փորձեց ճշտել, թե արդյոք այդ պայմանները կան, թե ոչ: Մենք պատասխանել ենք, որ կան: Նշվել է, որ այդ ամենը կիրականացվի սահմանված ընթացակարգի համաձայն: Եթե տարընկալում է եղել այդ պատասխանի մեջ, այս անգամ արդեն շատ կարճ ու հստակ նշվել է, որ այդ տեսաձայնագրությունը կտրամադրվի»: