News Georgia-ի փոխանցմամբ՝ WikiLeaks-յան բացահայտումներից 2009 թվականի սեպտեմբերի 25-ին թվագրված հաղորդագրության մեջ ներկայացված են Վրաստանի նախագահ Միխեիլ Սաակաշիլիի և տվյալ ժամանակ Եվրոպայի ու Եվրասիայի հարցերով ԱՄՆ փոխպետքարտուղարի օգնական Թինա Քեյդենաուի միջև տեղի ունեցած զրույցի մանրամասները, ինչը տեղ է գտել Վրաստանում ԱՄՆ դեսպան Ջոն Բասի հաշվետվության մեջ։
Հանդիպման ժամանակ Սաակաշվիլին Քեյդենաուին հայտնել է 2008 թվականի փետրվարին Ռուսաստանի նախագահ (տվյալ ժամանակ) Վլադիմիր Պուտինի հետ ունեցած անկեղծ զրույցի մասին։ Սաակաշվիլիի խոսքերով՝ Պուտինն իրեն ասել է՝ «պատրաստվի՛ր», քանի որ ակնհայտ է, որ Արևմուտքը պատրաստվում է ճանաչել Կոսովոն.
«Պուտինն ակնարկել է, որ եթե Վրաստանը հրաժարվի ՆԱՏՕ-ի հետ մերձեցումից, այդ դեպքում հնարավոր է՝ Ռուսաստանը չճանաչի Աբխազիան և Հարավային Օսիան։ Վրաստանի և Ռուսաստանի միջև լարված հարաբերությունները Պուտինի առջև մարտահրավերներ են ստեղծում ողջ հետխորհրդային տարածքում։ Ռուսաստանը ցանկանում է բոլոր կողմերից շրջափակել մեզ»։
Հիշեցնենք, որ Սերբիայից Կոսովոյի անկախությունը հռչակվել է 2008 թվականի փետրվարի 17-ին, իսկ Ռուսաստանն Աբխազիայի անկախությունը ճանաչել է 2008 թվականի օգոստոսի 26-ին։
