Ադրբեջանական Trend լրատվական գործակալության փոխանցմամբ՝ Լիտվայի, Ղազախստանի ու Իռլանդիայի արտգործնախարարները և ԵՄ-ի արտաքին քաղաքականության բարձրագույն հանձնակատար Քեթրին Էշթոնը հուլիսի 18-ին Բրյուսելում տեղի ունեցած հանդիպման ժամանակ քննարկել են ԵԱՀԿ-ի և ԵՄ-ի շրջանակներում համագործակցության հարցը։
Հանդիպումը նախագահել է ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսը, ով հայտարարել է. «ԵԱՀԿ-ն և ԵՄ-ը կիսում են բարգավաճող կայուն, խաղաղ տարածաշրջանի արժեքները, ուր հարգվում են մարդու իրավունքներն ու օրենքի գերակայությունը։ Միմյանց հետ համագործակցելով՝ մենք երաշխավորում ենք, որ մեր սահմանափակ ռեսուրսներն օպտիմալ կօգտագործվեն»։
Նախարարների «եռյակը» և Էշթոնը քննարկել են ԵԱՀԿ Նախարարների խորհրդի նիստի նախապատրաստմանն առնչվող խնդիրներ, որը տեղի է ունենալու դեկտեմբերի 6-7-ին, Վիլնյուսում։ Աժուբալիսը ողջունել է դրանում մասնակցություն ունենալու Էշթոնի պլանը։ Նիստին մասնակցելու են ԵԱՀԿ անդամ 56 երկրները, որոնց գրեթե կեսը կազմում են ԵՄ-ի անդամ 27 երկրները։
Բրյուսելյան հանդիպման ժամանակ քննարկվել են նաև ԵԱՀԿ-ի տարածաշրջանում ձգձգվող հակամարտությունների կարգավորման ուղղությամբ գործադրվող ջանքերը։ Հանդիպմանը մասնակցել է նաև ԵԱՀԿ գլխավոր քարտուղար Լամբերտո Զանիերը։
Հիշեցնենք, որ Ղազախստանը ԵԱՀԿ-ում նախագահել է 2010 թվականին, այս տարի դա վերապահվել է Լիտվային, ով հաջորդ տարի ԵԱՀԿ-ի նախագահությունը զիջելու է Իռլանդիային։
