Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում՝ Գագիկ Խանդանյանի նախագահությամբ, տեղի ունեցավ Երևանի Սայաթ-Նովա պողոտայի, Թումանյան, Ավագ Պետրոսյան, Նալբանդյան փողոցների հատվածում գտնվող շենքերի բնակիչների հայցն ընդդեմ Նալբանդյան 106/1 հասցեի կառուցապատող «Ավագ Շին» ՍՊԸ-ի: Բնակիչները դժգոհում են, որ իրենց բակի հենց կենտրոնում կառուցվում է բազմաբնակարան համալիր, այստեղ սկզբում ծառերն են հատել, այնուհետև սկսել հողաշինարարական աշխատանքները։
Ըստ համահայցվորների ներկայացուցիչ Հերիքնազ Տիգրանյանի՝ սկզբում որոշված է եղել կառուցել 16-հարկանի շինություն, սակայն այսօր պարզ դարձավ, որ կառուցվելու է 9-հարկանի բազմաբնակարան համալիր։ Ինչպես նշում են համահայցվորները, այդ բազմաբնակարան շենքը ամբողջովին խախտելու է իրենց բնականոն հանգիստը։ Շրջակա բոլոր շենքերը 5-6-հարկանի են, և այս կառուցվող շենքը զրկելու է բնակիչներին արևի բնական լույսից, կան ևս այլ հարցեր, օրինակ՝ երեխաները զրկվելու են խաղահրապարակից, մասնակիորեն լինելու է ծառահատում։
Արդեն դատական նիստերի դահլիճում պատասխանող կողմի ներկայացուցիչ Մինաս Ամիրյանը դեմ արտահայտվեց նկարահանմանը՝ պատճառաբանելով, որ կաշկանդվում է, վերջում հրաժարվեց հարցազրույց տալուց, իսկ բուն դատական նիստի ժամանակ չէր կարողանում հստակ ձևակերպել իր ասելիքը. նախ ասաց, որ գոյություն ունի կառուցման նախագիծ, այնուհետև ժխտեց իր այդ խոսքը՝ ասելով, որ դեռ նախագիծը չկա։ Մինաս Ամիրյանը չէր մոռանում մի քանի րոպեն մեկ կրկնել «գերակա հանրային շահ» արտահայտությունը, իսկ հայցվորները գերակա հանրային շահ համարում էին իրենց երեխաների ապագան, որը կառուցապատող ընկերությունը, փաստորեն, խախտում է։
Դատավոր Գագիկ Խանդանյանը, լսելով կողմերին, բավարարեց հայցվոր կողմի միջնորդությունը՝ հետաձգելով դատական նիստը մինչև օգոստոսի 5-ը, մինչ այդ համահայցվորները սպասում են կառուցման մասին տարվող փորձագիտական եզրակացության պատասխանին։
