Չնայած նախագահի թեկնածուների մեծամասնության հորդորին, Արցախում նախագահական ու խորհրդարանական ընտրությունները չհետաձգվեցին։ Կանխատեսվում էր, որ կորոնավիրուսի համաճարակով պայմանավորված հնարավոր է մարդկանց հոսքը տեղամասեր քիչ լինի, թեպետ պաշտոնապես հայտարարվում է, որ առ այս պահը Արցախում որևէ դեպք չի հայտնաբերվել։Վաղ առավոտից հետևելով Արցախում ընթացող ընտրությունների քվեարկության ընթացքին տեսնում ենք, որ տեղամասերի դիմաց կան նույնիսկ մարդկային կուտակումներ, ուստի և քվեարկության պակասի խնդիր էլ չի լինի։
«Առաջին լրատվական»-ի զրույցում քաղտեխնոլոգ Վիգեն Հակոբյանն ասաց՝ ընտրությունները ոչ միայն կայացան, այլև բավականին ակտիվ մասնակցություն կար.«Դուք գիտեք, որ մտավախություն կար, որ մասնակցության տոկոսը ցածր է լինելու՝ կապված պանդեմիայի իրավիաճով։ Ու նաև կարծիք կար, որ դա ինչ-որ չափով ընտրողների շրջանում որոշակի պասիվություն լինել դրա հետ կապված։ Բայց կարծում եմ, որ բավականին լուրջ ու լավ կազմակերպեցին անվտանգության կանխարգելիչ քայլերը ու մարդիկ անկաշկանդ գնացին տեղամասեր»։
Ըստ Հակոբյանի՝ մեծ նշանակություն ունի նաև այն հանգամանքը, որ միանգամից երկու ընտրություն է անցկացվում.«Կան բազմաթիվ նախագահի թեկնածուներ ու ԱԺ ընտրություններին մասնակցող քաղաքական ուժեր, յուրաքանչյուրը փորձել է բերել իր ընտրողին։ Նաև դրանով է պայմանվորված ակտիվությունը»։
Եվ քանի որ կա մեծ ակտվիություն , հետևաբար մասնակցության բարձր տոկոս, սա ըստ Հակոբյանի, հիմք է ստեղծում մտածելու, որ կարող է լինել երկրորդ փուլ.«Որովհետև նման մասնակցության պայմաններում,երբ ամեն մեկն իր ընտրողին կարողանում է տեղամասեր բերել, ձայները կարող են փոշիացվել, կմեծանա երկրորդ փուլի հնարավորությունը»։
Արդյոք կլինեն հետընտրական զարգացումներ հարցին ի պատասխան, մեր զրուցակիցն ասաց՝ դա անցանկալի սցենար կլինի Արցախի համար.«Հետընտրական զարգացումները կախված են նրանից, թե ինչ արդյունք կլինի։ Հետընտրական զարգացումների համար պետք է լինեն ընթացքից դժգոհներ, որովհետև ամեն դեպքոմ մինչև ընտրություններ մեծ դժգոհություններ չեն եղել։ Թեկնածուները կամ մասնակից քաղաքական ուժերը լուրջ դժգոհություններ չեն ներկայացրել, կարծես թե բուն ընթացքը հնարավորինս մաքուր է անցնում։ Ինչո՞ւ լինեն հետընտրական պրոցեսներ, հիմքերը որո՞նք են լինելու։ Ինչպես Հայաստանում է մշտապես եղել՝ սովորաբար այդպիսի հիմքեր լինում են ընտրակեղծիքները, երբ ինչ-որ քաղաքական ուժ համարում է, որ պաշտոնական արդյունքները չեն համապատասխանում իրականությանը։ Այս պահի դրությամբ ամեն ինչ ընթանում է մաքսիմալ մոտ օրենքի պահանջներին։ Դժվար է կանխատեսել, թեպետ դա ամենաանցանկալին կլինի Արցախի համար»։
Լուսանկարը՝ Armeniasputnik-ի