Ադրբեջանական Salam News գործակալության փոխանցմամբ՝թուրքական կառավարությունը սպասում է երկու երկրների միջև անցագրային ռեժիմի վերացման հարցում պաշտոնական Բաքվի պատասխանին։ Այս մասին հայտարարել է Թուրքիայի արտգործնախարարության մամլո քարտուղար Սելչուք Ունալը։
Վերջինս ընդգծել է, որ որոշ ժամանակ առաջ Թուրքիան տվյալ հարցի շուրջ դիմել է ադրբեջանական կողմին, սակայն ցայժմ պատասխան չի ստացել։ Ունալի խոսքերով, իր երկիրն այժմ սպասում է պաշտոնական Բաքվի պատասխանին։ Նա չի բացառել, որ տվյալ խնդիրը կարող է քննարկվել Թուրքիայի վարչապետ Էրդողանի ադրբեջանական այցի ժամանակ։
Հիշեցնենք, որ 2008 թվականին Թուրքիան միակողմանիորեն վերացրել է Ադրբեջանի հետ գործող անցագրային ռեժիմը։
Ի դեպ, Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը թուրքական Today’s Zaman թերթին տված հարցազրույցում Ադրբեջանի ու Թուրքիայի միջև գործող անցագրային ռեժիմի չվերացման հարցում մեղադրել է Իրանին. «Մենք ոչ մի խնդիր չենք տեսնում Թուրքիայի հետ անցագրային ռեժիմի վերացման հարցում, սակայն Իրանը խոչընդոտում է դրան՝ պահանջելով նույնն անել իր նկատմամբ։ Հակառակ դեպքում Իրանը զգուշացրել է, որ կկտրի Նախիջևանի ու Ադրբեջանի միջև ցամաքային կապը։ Ադրբեջանը պետք է միաժամանակ անցագրային ռեժիմը վերացնի Թուրքիայի ու Իրանի հետ։ Սակայն ես չեմ կարծում, թե տվյալ փուլում Ադրբեջանի կառավարությունը պատրաստ է այդ քայլին գնալուն»։
Հասանովը, սակայն, հետագայում հերքել էր իր այդ խոսքերը՝ ընդգծելով, որ ինքը միայն նկատի է ունեցել այն, որ Թուրքիայի հետ գործող անցագրային ռեժիմի վերացումը կարող է դերակատարում ունենալ նաև Իրանի հետ միաժամանակ անցագրային ռեժիմի վերացման հարցում։
