Ադրբեջանական 1news.az-ի հաղորդմամբ՝ հուլիսի 30-ին ավելի քան 100 ադրբեջանցի զինծառայողներ մասնակցելու են Ռումինիայում տեղի ունենալիք ԱՄՆ-ի հետ համատեղ զորավարժություններին։
Այս մասին Ադրբեջանի պաշտպանության նախարարության և ԱՄՆ-ի եվրոպական հրամանատարության մասնագետների մասնակցությամբ անցկացվող երկօրյա սեմինարի ժամանակ հայտարարել է Ադրբեջանի պաշտպանության նախարարության միջազգային բաժնի պետ, գեներալ Ռամիզ Նաջաֆովը։
Վերջինիս խոսքերով՝ առաջիկա զորավարժությունները դառնալու են ընթացիկ տարվա ամենալայնամասշտաբ զորավարժությունները. «Պլանի համաձայն՝ զորավարժությունները տևելու են երկու շաբաթ։ Այդ զորավարժություններին ադրբեջանցի զինծառայողները կմասնակցեն իրենց զենքով ու հանդերձանքով։
Այդ նպատակով հատկացված է նաև առանձին ռազմա-տրանսպորտային ինքնաթիռ, որն ադրբեջանցի զինծառայողներին կփոխադրի Ռումինիա»։
Հիշեցնենք, որ սեպտեմբերին համանման ամերիկա-ադրբեջանական զորավարժություններ պետք է անցկացվեն Գերմանիայում։
