«Հանրաքվեի նախապատրաստական աշխատանքներն ընթանում են ամբողջ ծավալով, ժամկետային որևէ խախտում չկա, աշխատանքը պլանավորված է և մինչև քվեարկության օրը բոլոր նախապատրաստական աշխատանքները պատշաճ կերպով և ժամկետներում ավարտված կլիեն»,- «Առաջին լրատվական»-ի հետ զրույցում վստահեցրեց ԿԸՀ նախագահ Տիգրան Մուկուչյանը: Նրա խոսքով՝ ընտրողների գրանցումն իրականացվելու է տեխնիկական սարքավորումների կիրառմամբ, կգործարկվի 4000 տեխնիկական սարքավորում, տեսախցիկներ կտեղադրվեն 1 500 տեղամասում: Քվեաթերթիկի նմուշը կհաստատվի քվեարկությունից 10 օր առաջ, որին կհաջորդի տպագրումը և տեղամասային հանձնաժողովներին հատկացումը:
Անդրադառնալով դիտարկմանը, որ վերջին օրերին քննարկվում և մտահոգություն է արտահայտվում՝ կապված ընտրական հանձնաժողովներում նախկին իշխանությունների կողմից նշանակված անձանց ներգրավման հետ, Տիգրան Մուկուչյանը նշեց. «Նախ՝ պետք է հասկանանք՝ ինչպես են ձևավորվում տեղամասային ընտրական հանձնաժողովները: Մենք ունենք 2008 տեղամաս, հետևաբար գործելու է 2008 ընտրական հանձնաժողով: Հանձնաժողովի նախագահների և քարտուղարների տեղերը տեղաբաշխված են ԱՅՈ և ՈՉ քարոզչության կողմերի միջև, յուրաքանչյուր կողմից ներգրավված է 2 ներկայացուցիչ: Մյուս 3 տեղերը զբաղեցնում են տարածքային ընտրական հանձնաժողովների անդամները. գործում է կանոն, ըստ որի՝ հանձնաժողովի անդամ կարող է նշանակվել այն անձը, որը մասնակցել է մասնագիտական դասընթացների կամ ստուգարքի և ստացել որակավորման վկայական: Երբ արդեն որոշվեց հանրաքվե անցկացնել և կողմերը գրանցվեցին, չնայած որ ժամկետները բավականին սեղմ էին, կազմակերպեցինք երկօրյա լրացուցիչ ստուգարք… Հանձնաժողովականների մեջ, իհարկե, կան մարդիկ, որոնք աշխատել են նախկինում, այդ թվում՝ նաև 2018թ., բայց տարօրինակ է, որ այդ ժամանակ այդ հարցը չի բարձրացվել: Երկրորդ՝ եթե որևէ հանձնաժողովական մասնակցել է ընտրական գործընթացին և թույլ է տվել ընտրակեղծարարություն, իսկ ընտրակեղծարարությունը հանցագործություն է, հետևաբար այդ անձը պետք է սահմանված կարգով ստացած լիներ պատիժ, և եթե որևէ հոդվածով ունենար դատվածություն և այլն, դա արդեն խոչընդոտ կլիներ, որ նա ընդգրկվեր հանձնաժողովում: Այս կամ այն քաղաքական ուժի կողմից նախկինում տարածքային ընտրական հանձնաժողովում նշանակված լինելը մեխանիկորեն չի կարող դատողությունների հիմք հանդիսանալ»:
Տ.Մուկուչյանը նաև ընդգծեց, որ հանրաքվեի առանձնահատկություններից է այն, որ հանրաքվեի ժամանակ տեղական դիտորդական առաքելություն իրականացնելու իրավունք ունեն ոչ միայն ՀԿ-ները, այլ նաև ՀՀ -ում գրանցված կուսակցությունները:
Մանրամասն՝ տեսանյութում:
