«Այդ ծրագիրը նկատելի առաջընթաց քայլ կլինի հատուկ պահպանվող տարածքների համայնքների զարգացման համար: Դա հիմնականում միտված է նրան, որ սոցիալ-տնտեսական հարցերը լուծվեն, որպեսզի հատուկ պահպանվող տարածքներին հարակից և նրա մեջ գտնվող համայնքները հնարավորինս քիչ վնասեն բնությանը»,- «Առաջին լրատվական»-ի հետ զրույցում նման կարծիք հայտնեց «Խուստուփ» ՀԿ նախագահ Վլադիկ Մարտիրոսյանը՝ մեկնաբանելով ՀՀ ֆինանսների նախարարության, բնապահպանության նախարարության և KfW-ի միջև ստորագրված «Կովկասի պահպանվող տարածքների աջակցության ծրագիր – Հայաստան (Էկոտարածաշրջանային ծրագիր – Հայաստան, փուլ 3-րդ)» ֆինանսավորման համաձայնագիրը, որի շրջանակներում իրականացվելու է «Շիկահող կենսոլորտային պահպանավայրի ստեղծման ծրագիրը»: Գերմանական կողմն այդ նպատակով հատկացնում է 4 մլն եվրո դրամաշնորհ:
Սյունիքի մարզում նախատեսվում է վերազինել Շիկահողի արգելոցը, «Արևիկ» ազգային պարկը և Կապանի անտառտնտեսությունը, առաջին անգամ ստեղծվելու է կենսոլորտային տարածք, գումարներ կհատկացվեն նաև մարզի սոցիալ-տնտեսական զարգացման համար:
Միաժամանակ, Վ.Մարտիրոսյանը նշեց, որ նախարարությունը պետք է թափանցիկ ծրագրեր մշակի, թե ի՞նչ է արվելու, գումարները ո՞նց են ծախսվելու. «Օրինակ, եթե արտադրություն հիմնվի, դրա օգուտները ինչպե՞ս են բաշխվելու համայնքի միջև: Սա շատ խրթին հարց է, և մանրակրկիտ ուսումնասիրություն է պետք»:
