Մեծ Բրիտանիայի պաշտպանության նախարարությունն ԱՄՆ-ին առաջարկել է փոխանակվել F-35 կործանիչներով՝ դրանք շահագործման ընդունելուց հետո: Այս մասին հայտնում է Defence News-ը՝ հղում կատարելով Պենտագոնի մի նամակին, որն ուղղված է եղել Կոնգրեսին: Առաջարկի համաձայն՝ Մեծ Բրիտանիան մտադիր է ԱՄՆ-ին տալ բոլոր գնված F-35B կործանիչները՝ փոխարենը ստանալով նույն քանակությամբ տախտակամածով նավերի համար նախատեսված F-35C: Որպեսզի Պենտագոնի բնութագրմամբ «փոխշահավետ» և «լրացուցիչ ներդրումներ չպահանջող» փոխանակումն իրականացվի, անհրաժեշտ է համապատասխան փոփոխություններ մտցնել 2012թ.-ի ռազմական բյուջեում:
2010թ.-ի հոկտեմբերին Մեծ Բրիտանիայի կառավարությունը Ազգային անվտանգության նոր հայեցակարգ է ընդունել, որի շրջանակներում պլանավորվում է կրճատել ռազմական ծախսերը: Փաստաթուղթը նախատեսում է հրաժարվել կարճ թռիչքուղի պահանջող F-35B-ից և ընտրել տախտակամածային F-35C: Հայեցակարգն արդեն ուժի մեջ է, սակայն Մեծ Բրիտանիան, այնուամենայնիվ, կստանա որոշ քանակությամբ F-35B, քանի որ արդեն պայմանագիր է ստորագրել: Պայմանագրի բարեհաջող կատարման դեպքում Մեծ Բրիտանիան կստանա ԱՄՆ ՌԾՈՒ-ի F-35B կործանիչները:
Բրիտանական կողմի առաջարկի համաձայն՝ բոլոր F-35B կործանիչները, որոնք ստանալու է երկիրը, պետք է անցնեն նորացման համակարգային ծրագիր, որից հետո կհամապատասխանեն ԱՄՆ ՌԾՈՒ-ի պահանջներին: Արդիականացման ծախսերն իր վրա է վերցնում Մեծ Բրիտանիան: Փոխանակման շնորհիվ ԱՄՆ ծովային կորպուսը կստանա լրացուցիչ F-35B կործանիչներ: F-35B և F-35C կործանիչների վաճառքով զբաղվում է ԱՄՆ ՌԾՈՒ-ն:
