Գործարար Սիլվա Համբարձումյանը դժգոհ է Հայաստանում դատական համակարգից։ Գործարարը պնդում է, որ հանքերի շահագործման լիցենզիա ստանալու համար 2008 թվականին 14 միլիոն դոլար կաշառք է տվել բնապահպանության նախկին նախարար, ԱԺ նախկին պատգամավոր Արամ Հարությունյանին և դրա մասին արդեն 3 տարի է՝ բարձրաձայնում է: Չորս ամիս Արամ Հարությունյանի գործը քննող դատավորն անցել է թոշակի, գործով դատավոր է նշանակվել Սամվել Հովհաննիսյանը, որը նոր պետք է ծանոթանա գործին։ «Ապօրինի ծագում ունեցող գույքի բռնագանձման մասին» օրենքի նախագիծը, որ շուտով կընդունվի խորհրդարանի կողմից, գործարարին հույս է ներշնչում, որ կկարողանա վերադարձնել իրենից, իր իսկ բնորոշմամբ, գողացածը։ Գործարարը պնդում է, որ Արամ Հարությունյանը 14 միլիոն դոլար պետք է վերադարձնի, Սյունիքի նախկին մարզպետ Սուրեն Խաչատրյանը՝ 112 միլիոն դրամ, իսկ Վարդան Այվազյանը՝ 70․000 դոլար։
«Աբսուրդ դատական համակարգ և ԴԱՀԿ ունենք, ամբողջը բարձիթողի վիճակում է»,- պնդեց Սիլվա Համբարձումյանը։ Արդարադատության նախարարին հասցրել է իր հետ տեղի ունեցած բոլոր անօրինականությունները ներկայացնել։ «Նա էլ, կարծես, ոչ մի քայլ չի ձեռնարկում, գործարարները մեծ խնդիրներ են ունենալու, եթե այսպես շարունակվի։ Օրինակ՝ ես պարոն Բադասյանին երկու դատավորների՝ Արթուր Մկրտչյանի և Ալեքսանդր Սաքոյանի կայացրած երկու վճիռներն եմ ուղարկել, ոչ մի պատասխան։ Ոչ մի գործ ավարտին չի հասցված, ինչով է իշխանությունը զբաղված, ոչ մի հարցի չեն կարողանում լուծումներ տալ»,- հավելեց նա։
Գործարարը հարց է բարձրացնում՝ ներդրումներ անել Հայաստանում, թե ոչ, բերել գործարարներ արտերկրից, թե ոչ։ Վերջերս, նրա խոսքերով, ներդրողներ են եկել Ստավրոպոլից, բայց չեն կարողացել վարչապետին տեսնել, վարչապետի հետ հանդիպումը խոչընդոտել են, վերջիններս հեռացել են Հայաստանից։ Նա նշեց, որ գործարարը, որ եկել էր Հայաստան և հետաքրքրված էր ներդրումներով, Ռուբեն Բաղինյանն է։
«Նրանք ինձ պատահական հանդիպեցին, ասացին՝ գնում ենք, քանի որ խոչընդոտ է եղել վարչապետի հետ հանդիպման հետ կապված, մենք միայն վստահում ենք վարչապետի խոսքին, այն էլ չեն հանդիպում։ Ներդրումների համար պետք է ամեն պայման ապահովել»,- պնդեց Համբարձումյանը։
