Չինաստանի իշխանությունները հետաձգել են Հարրի Փոթերի մասին ֆիլմի վերջին մասի ցուցադրությունը՝ իշխող կոմունիստական կուսակցության 90-ամյակի հետ կապված, որի կազմում կա ավելի քան 80 մլն անդամ: Այս մասին գրում է the Guardian թերթը: Հարրի Փոթերի «Մահվան Պարգևների» ցուցադրության փոխարեն, Պեկինը պատրաստվում է ցուցադրել «Կուսակցության ստեղծումը» հերոսապատումը, որում նկարահանվել են չինական կինոյի 150 աստղեր:
Ինչպես գրում է թերթը, մայրաքաղաքի Տյանանմեն հրապարակում տեղադրել են ՉԿԿ տարբերանշանները: Պեկինում առևտրականները զբաղված են Հարրի Փոթերի մասին ֆիլմի կեղծ DVD-ների վաճառքով, որոնք տարբերվում են իրենց ցածր որակով:
Մոգի մասին ֆիլմի վերջին մասը պլանավորված է ցուցադրել օգոստոսի 4-ին, իսկ «Տրանսֆորմեր 3»-ի ցուցադրությունը տեղի կունենա եկող չորեքշաբթի: Ազգային կինեմատոգրաֆիան զարգացնելու և արևմտյան ֆիլմերի ազդեցությունից չինացիներին ետ պահելու համար Պեկինը տարեկան թույլ է տալիս ցուցադրել արտասահմանում նկարահանված ընդամենը 20 ֆիլմ:
