Չինաստանի հարավի Գուանդունի նահանգում Xingshi Equipments չինական ընկերության ֆաբրիկան ապահովել է օրական 1,2 մլն բժշկական դիմակների արտադրությունը նոր կորոնավիրուսի հարուցած հիվանդության բռնկման պատճառով արագ աճող ներքին պահանջարկի ֆոնին՝ տեղեկացնում է TASS-ը։
Տեղեկությունների համաձայն՝ ավտոմատացված գիծը, որն ավելի վաղ թողարկում էր երեխաների տակաշորեր և բժշկական անձեռոցիկներ, Գուանչժոու քաղաքի (Գուանդունի նահանգի վարչական կենտրոն) վարչակազմի կարգադրությամբ կարողացել են ամենակարճ ժամկետում վերակառուցել պահանջված արտադրանքի զանգվածային արտադրության համար: Մասնագետներից մեկ շաբաթ է պահանջվել նոր սարքավորումների հավաքման համար: Ինչպես հայտնել են տեղի իշխանությունները՝ մինչև մարտի վերջ ֆաբրիկան լրացուցիչ կգործարկի ևս 12 օժանդակ արտադրական գիծ:
ՉԺՀ-ի Առողջապահության պետական կոմիտեի վերջին տվյալների համաձայն՝ երկրում հաստատվել է Covid-19 կորոնավիրուսով վարակման 77 հազար 150 դեպք, 2 592 մարդ մահացել է: Անցած 24 ժամվա ընթացքում երկրում հիվանդացածների թիվն ավելացել է 409-ով, մահացածներինը՝ 150-ով: Նրանցից հիվանդության էպիկենտրոն Հուբեյ նահանգում մահացել է 149 մարդ, ևս մեկը Հայնանի նահանգում: Հիվանդանոցներում բուժումը ներկայում շարունակում է 49,8 հազար մարդ, ավելի քան 9,9 հազարի վիճակը գնահատվում է ծանր: Ուհան քաղաքում (Հուբեյ վարչական կենտրոն) գրանցվել է կրկնական վարակման 195 դեպք: