Հարավային Կորեայի Ազգային ժողովը չեղարկել է լիագումար նիստը և ախտահանման համար շենքը փակել այն բանից հետո, երբ հայտնի է դարձել, որ այնտեղ կորոնավիրուսով հիվանդ է եղել: Այդ մասին հայտնել է Ազգային ժողովի ներկայացուցիչ Հան Մին Սուն՝ տեղեկացնում է RIA Novosti-ն։
«Այսօր 18:00-ից (Երևանի ժամանակով 13:00) ախտահանում է անցկացվելու… Որպեսզի այն արդյունավետ լինի, անհրաժեշտ է հաստատությունը փակել գոնե 24 ժամով: Փետրվարի 25-ին Ազգային ժողովի շենքը և պատգամավորների (գրասենյակների) շենքը փակ կլինեն»,- հայտնել է Հան Մին Սուն մամուլի ասուլիսում:
Շենքը վերստին կբացեն փետրվարի 26-ին ժամը 09:00-ին: Այդ կապակցությամբ խորհրդարանի փետրվարի 24-ի և 25-ի նիստերը չեղարկված են:
Ավելի վաղ տեղեկացվել էր, որ փետրվարի 22-ին կորոնավիրուս էին ախտորոշել Ուսուցիչների ասոցիացիաների կորեական դաշնության նախագահ Հա Յուն Սուի մոտ, որն անցյալ շաբաթ ներկա է եղել խորհրդարանի նիստին, նա ենթարկվել է կարանտինի: Նրա հետ պատգամավորներ էին շփվել մի քանի պահպանողական կուսակցությունների՝ վերջերս ստեղծված «Ապագայի միավորված կուսակցություն» (UFP) դաշինքից: Այժմ ստուգում են նրանց մոտ վիրուսի առկայությունը: UFP-ն և կառավարող Դեմոկրատական կուսակցությունը նաև չեղարկել են իրենց պատգամավորների ընդհանուր ժողովը: Կորեայի Հանրապետության մշակույթի և զբոսաշրջության նախարարությունը նույնպես հայտնել է, որ կորոնավիրուսի տարածման վտանգի պատճառով ժամանակավորապես կփակի պետական պատմական ու գեղարվեստական թանգարաններն ու գրադարանները: Ընդհանուր թվով 24 հաստատություններ փետրվարի 24-ից աստիճանաբար կդադարեն աշխատել: Կորոնավիրուսով երկրում վարակվել է 833 մարդ, 11 հազար 631 մարդու անալիզները հետազոտվում են: Մահացել է յոթ հիվանդ, դուրս է գրվել 18 մարդ։
