ԱՄՆ-ի Վերմոնտի նահանգից սենատոր Բեռնի Սանդերսը Դեմոկրատական կուսակցության կողմնակիցների աջակցության մակարդակով առաջ է անցել ԱՄՆ-ի նախագահի պաշտոնի մնացած հավակնորդներից: Այս մասին են վկայում հասարակական կարծիքի համազգային հարցման արդյունքները, որն անցկացվել Է NBC հեռուստաընկերության և The Wall Street Journal թերթի պատվերով:
Սանդերսի աջակցության մակարդակը կազմում է 27 տոկոս և անփոփոխ է մնում հունվարի վերջին կատարված նախորդ սոցիոլոգիական հետազոտության համեմատությամբ: ԱՄՆ-ի նախկին փոխնախագահ Ջոզեֆ Բայդենի ժողովրդականությունը, որը պարտություն է կրել փետրվարի 3-ին Այովայի նահանգում կուսակցական ակտիվիստների ժողովներում (քոկուսներում) և փետրվարի 11-ին Նյու Հեմփշիրի նահանգում սկզբնական ընտրություններում (փրայմերիզներում), կտրուկ իջել է 11 տոկոսային կետով՝ հասնելով 15 տոկոսի նշագծին: Բայդենին հաջորդում են Նյու Յորքի նախկին քաղաքագլուխ Մայքլ Բլումբերգը (14 տոկոս), Մասաչուսեթսից սենատոր Էլիզաբեթ Ուորենը (14 տոկոս), Սաութ Բենդ քաղաքի (Ինդիանայի նահանգ) նախկին քաղաքագլուխ Փիթ Բութեջաչը (13 տոկոս) և Մինեսոտայից սենատոր Էմի Քլոբուշարը (7 տոկոս): Անցած օրացուցային ամսում նրանցից իրենց դիրքերն էականորեն ամրապնդել են Բլումբերգը, Բութեջաչը եւ Քլոբուշարը: Փետրվարի 14-ից մինչև17-ը կատարված հեռախոսային հարցմանը մասնակցել է 900 մարդ գրանցված ընտրողների թվից: Սխալանքի հավանականությունը կազմում Է 3,27 տոկոսային կետ: