Քաղաքագետ Ստեփան Սաֆարյանի նշանակումը Հանրային խորհրդի նախագահի պաշտոնում նրա՝ երբեմնի անդամներից ոմանց ստիպեց վերանայել իրենց դիրքորոշումը և նախկին նախագահ Վազգեն Մանուկյանի հետ լքել այդ կառույցը։ Հեռացողներից էին ՀՀ Մարդու իրավունքների առաջին պաշտպան Լարիսա Ալավերդյանը, կառավարման փորձագետ Հարություն Մեսրոբյանը, Բաբկեն Պիպոյանը, գեներալ-մայոր Արկադի Տեր-Թադևոսյանը՝ Կոմանդոսը, սկզբում հեռացավ, սակայն ավելի ուշ վերադարձավ։
Ինքը՝ Ստեփան Սաֆարյանը, հենց սկզբից հայտարարեց, որ հակված է հանրության շրջանում «կույր աղիք»-ի համբավ ձեռք բերած այդ կառույցը «ռեստարտ» անելուն, նրա առաքելությունը հանրությանը հասանելի դարձնելուն։
«Առաջին լրատվական»-ը հետաքրքրվեց, թե տեղի՞ է ունեցել Հանրային խորհրդի անդամների՝ թափուր պաշտոններում համալրում։
«Հանրային խորհրդում ընդամենը մեկ անդամի տեղ է թափուր, այն էլ համալրվում է նորով։ Այս պահին ընթանում են հանձնաժողովի համալրումներ, քանի որ շատ կազմակերպություններ դուրս են եկել, և շատերն անդամակցում են։ Հիմա անդամակցության գործընթացն ավարտում ենք։ Խոսքը վերաբերում է քաղաքացիական հասարակության արդի հանձնաժողովին, որի նախագահը Լարիսա Ալավերդյանն էր։ Քանի որ այդ հանձնաժողովից եղել են նոր դուրս եկողներ, և կան անդամակցության համար ներկայացված հայտեր, դրանք հաստատվում են, որպեսզի համապատասխանեն չափանիշներին։ Մոտ ժամանակներս կնշանակվի հանձնաժողովի նիստ՝ հանձնաժողովի նախագահ ընտրելու օրակարգով, որից հետո արդեն հանձնաժողովի նախագահը կհամարվի Հանրային խորհրդի անդամ»,- ասաց Ստեփան Սաֆարյանը։
Մյուս թափուր տեղերը, ըստ ՀԽ նախագահի, համալրել են Դանիել Իոաննիսյանը, Ալբերտ Ստեփանյանը, Գագիկ Մակարյանը։
Ստեփան Սաֆարյանը հավաստիացնում է, որ արդեն մշակել և իր գործընկերներին է ուղարկել ռազմավարական փաստաթուղթ, որը վերաբերում է ՀԽ-ի ինստիտուցիոնալ ձևի ամրապնդմանը, և որն առաջիկայում կհաստատվի, հետո էլ կկազմենք գործողությունների ծրագիր՝ մեկ տարվա կտրվածքով։
Տարածքի խնդիր էլ ունի Հանրային խորհուրդը։
«Հանդիպել եմ պետական գույքի կառավարման կոմիտեի նախագահի հետ, ներկայացրել եմ մեր կարիքները։ Կառավարությունը շուտով որոշում կընդունի և կառաջարկի տարբերակներ»,- ասաց Ստեփան Սաֆարյանը։
