ԱԺ 2-րդ գումարման պատգամավոր, 2000-2003 թվականներին ՌԴ կառավարությունում ՀՀ կառավարության հատուկ ներկայացուցիչ Տարոն Սահակյանը պնդում է, որ ԱԱԾ նախկին տնօրեն Արթուր Վանեցյանի կողմից պետական հեղաշրջման փորձ եղել է:
«ԱԱԾ-ի կողմից արված հայտարարությունը, թե տեղեկություններ կամ փաստեր չունեն, որ Վանեցյանի գլխավորությամբ երկրում նախապատրաստվել է հեղաշրջում, չի համապատասխանում իրականությանը։ Ես Ազգային անվտանգության ծառայությունում հաղորդում եմ ներկայացրել հանցագործության մասին, ներկայացրել եմ փաստեր մի քանի դրվագներով՝ Երևանի քաղաքապետարանում կազմաքանդում իրականացնելու, ինչպես նաև թմրադեղերի հետ կապված։ Ես պնդում եմ, որ պարոն Վանեցյանի կողմից կազմակերպվել էր հեղաշրջում, և դրա վերաբերյալ փաստերը իմ կողմից ներկայացվել են ԱԱԾ։ Լավ կլինի, որ հանրապետության վարչապետը ինձ ընդունի և լսի վերջապես»,- «Առաջին լրատվական»-ի հետ զրույցում ասաց Տարոն Սահակյանը։
Մեր զրուցակիցը Հոկտեմբերի 27-ի կազմակերպիչների մասով գործի քննության վերսկսման և Վանեցյանի քաղաքականապես ակտիվանալու մեջ ուղիղ կապ է տեսնում։ Նրա խոսքով՝ «Վանեցյան օպերացիան» սկսվել է, որպեսզի կանխվի Հոկտեմբերի 27-ի գործից անջատված մասով քննության ընթացքը, թաքցվեն Հոկտեմբերի 27-ի կազմակերպիչների հետքերը։ «Մեր երկիրը հոկտեմբերի 27-ից հետո ներքաշվեց Լիտվինենկո օպերացիայի մեջ, Սկրիպալ օպերացիայի մեջ, իսկ հիմա ներքաշվում է Վանեցյան օպերացիայի մեջ, որը շատ վտանգավոր է։ Վանեցյան օպերացիան կարող է շատ լուրջ հետևանքներ ունենալ, եթե իշխանությունը շարունակի թուլություն ցուցաբերել»,- ասաց Սահակյանը։
Տարոն Սահակյանն անդրադարձավ նաև Վանեցյանի ու Ռամզան Կադիրովի կապերին։ Նա նշեց, որ Վանեցյանը Կադիրովի հետ նկարներն է տարածում, անընդհատ խոսում է դրա մասին, բայց դա մեկ նպատակ ունի՝ շեղել «Վանեցյան օպերացիայի» իրական կազմակերպիչներին բացահայտելու հնարավորությունից. «Վանեցյան օպերացիան հեղինակում և կազմակերպում են կոնկրետ անձինք։ Ես հիմա չեմ ասի այդ անունները, բայց ես կարող եմ միայն զգուշացնել, որ եթե քայլեր չձեռնարկվեն իշխանության կողմից, ազգային անվտանգության խնդիրներ են առաջ գալու։ Կարող եմ նաև ասել, որ հետքերը տանում են արտաքին աշխարհ։ Այն, որ Վանեցյանը «լոժնի ցելեր» է տալիս դեպի Ռուսաստան, Կադիրով, դա այդպես չէ։ Սա լրիվ ուրիշ ուղղությունից և ուրիշ նպատակով կազմակերպված գործողություն է և շատ վտանգավոր»։
Առավել մանրամասն՝ տեսանյութում: