ԵՄ-ի արտաքին գործերի եևւ անվտանգության քաղաքականության հարցերով գերագույն ներկայացուցիչ Ժոզեպ Բորելը և Իրանի արտաքին գործերի նախարար Մոհամադ Ջավադ Զարիֆը բանակցությունների երկու փուլ են անցկացրել Թեհրանում: Այդ մասին փետրվարի 3-ին հայտնել է IRNA իրանական գործակալությունը։
Նշվում է, որ հանդիպման ընթացքում կողմերն արծարծել են «Իրանի և Եվրոպայի երկկողմ հարաբերությունների հարցերը, ինչպես նաև քննարկել են տարածաշրջանի իրադրության զարգացումը, առանձին միջազգային իրադարձություններ»:
Ենթադրվում է, որ Բորելը Թեհրան իր երկօրյա այցի ընթացքում զրույց կանցկացնի իրանական խորհրդարանի խոսնակ Ալի Լարիջանիի հետ և հանդիպում կունենա Իրանի նախագահ Հասան Ռոհանիի հետ: Ավելի վաղ Իրանի ԱԳ նախարարության պաշտոնական ներկայացուցիչ Աբաս Մուսավին հայտնել է, որ Զարիֆը ԵՄ-ի դիվանագիտության ղեկավարի համար 14 էջանոց ուղերձ է պատրաստել, որը հարցեր է բովանդակում միջուկային գործարքի շուրջ Եվրոպայի դիրքորոշման վերաբերյալ: Դիվանագետի խոսքով՝ «Իրանը բազմաթիվ հարցեր ունի Եվրոպային, քանի որ միջուկային գործարքից ԱՄՆ-ի դուրս գալուց հետո նա դրսևորել է անգործություն և ամերիկյան ճնշմանը դիմակայելու անկարողություն»։
