ԱԺ «Բարգավաճ Հայաստան» խմբակցության պատգամավոր Վարդան Ղուկասյանը կհարցաքննվի Շիրակի մարզային քննչական վարչությունում։ Այս մասին լրագրողների հետ հանդիպման ժամանակ ասել է Շիրակի մարզի դատախազ Կարեն Գաբրիելյանը։ Վերջինիս փոխանցմամբ՝ «Թումո» կենտրոնի կողմից ներկայացված հաղորդման հիման վրա հարուցվել է քրեական գործ, որի շրջանակներում էլ կհարցաքննվի Գյումրու նախկին քաղաքապետը։
Քրեական գործը վերաբերում է Թումո կենտրոնին հատկացված քաղաքային զբոսայգու շինություններին։ Վիճարկվում է այն հարցը, որ կան տարածքներ ու շինություններ, որոնք Վարդան Ղուկասյանն օտարել է այլ անձանց։
«Պարզել ենք, որ այնտեղ կան շինություններ, որոնք ժամանակին նշված քաղաքապետի կողմից օտարվել են տարբեր անձանց։ Նաև պարզել ենք, որ այդ շինությունները գտնվել են Կումայրի արգելոցում և դրանց հատկացման իրավաչափությունն ու հիմնավորվածությունը պարզելու համար նշանակել ենք համալիր դատաշինարարատեխնիկական, դատաապրանքագիտական փորձաքննություն, որպեսզի պարզենք՝ արդյոք իրավասու էին այդ շինություններն օտարել, և արդյոք օտարված շինությունների գինը համապատասխանում է տվյալ տարում գործող շուկայական արժեքին»,-նշեց Կարեն Գաբրիելյանը։
ՇՄ դատախազն ընդգծեց՝ Թումոյի հատկացված այգու մեջ մտնող բոլոր շինությունները ֆիքսվել են, ինչպես նաև քաղաքապետարանից և կադաստրից տրամադրվել են դրանց վերաբերող բոլոր փաստաթղթերը. «Առերևույթ խախտումներ տեսել եմ նշված փաստերի կապակցությամբ, դրա համար հարուցվել է քրեական գործ ՀՀ ՔՕ 308 և 314-րդ հոդվածներով, այն է՝ պաշտոնական դիրքը չարաշահելը և պաշտոնական կեղծիք կատարելը։ Կստանանք փորձաքննության եզրակացությունը և կորոշենք անձանց մեղադրանք առաջադրելու հարցը»,-ասաց ՇՄ դատախազը։
Կարեն Գաբրիելյանը հավելեց, որքանով տեղյակ է Գյումրու նախկին քաղաքապետ Վարդան Ղուկասյանը չի հարցաքննվել, սակայն դատախազությունը նրան հարցաքննության հրավիրելու նախաձեռնություն ունի։
