«Հայաստանի եվրոպացի բարեկամներ» կազմակերպությանը սոցհարցումների ժամանակ հետաքրքրել է նաև Լեռնային Ղարաբաղի հակամարտության կարգավորման մասին հայաստանցիների պատկերացումները: Հարցումներից պարզվել է, որ հայաստանցիները դրական են վերաբերվում այն տարբերակներին, որոնք, նրանց կարծիքով, Լեռնային Ղարաբաղը Հայաստանին մոտ պահելու հետ մեկտեղ կօգնեն խաղաղության պահպանմանը: Հարցվածներից տղամարդիկ և ավելի բարձր կրթությամբ հարցվողների մեծամասնությունը հայտնում է, որ ամբողջությամբ կամ մասամբ է տեղեկացված կարգավորման գործընթացի ներկայիս փուլի մասին, սակայն երիտասարդների, կանանց ու միջնակարգ և ավելի ցածր կրթություն ունեցողների մեծամասնությունն ասում է, որ հիմնականում վատ է տեղեկացված կամ ընդհանրապես տեղեկացված չէ: Հայաստանցիները մեծապես կողմ են կարգավորման այն բաղադրիչներին, որոնք կերաշխավորեն Լեռնային Ղարաբաղի` Հայաստանին միացված լինելը, ինչպես օրինակ` երկու երկրները միացնող միջանցքի առկայությունը (այս բաղադրիչը նախընտրելու ցուցանիշը 10-բալանոց սանդղակով միջինում 7, 95 է), և կտրականապես դեմ են այն բաղադրիչներին, որոնք դիտարկվում են որպես մեծ զիջում Ադրբեջանին, հատկապես` Լեռնային Ղարաբաղի շրջակա տարածքների հանձնումը Ադրբեջանին (1,55` 10-բալանոց սանդղակով), անգամ այն դեպքում, եթե դա հակամարտության համակողմանի խաղաղ կարգավորման մաս լինի և ադրբեջանական զինված ուժերի մուտքը այդ տարածքներ արգելված լինի: Հարցվողները ձգտում են խաղաղության և բավական դրական են վերաբերվում այն միջոցներին, որոնք, իրենց կարծիքով, կօգնեն հակամարտության կարգավորմանը, սակայն առանց մեծ զիջումների, ինչպես օրինակ` հրադադարի ռեժիմի ամրապնդումը և փոխվստահության միջավայրի ստեղծումը` խաղաղության հաստատման բանակցությունների հետագա առաջընթացի ավելի ամուր հիմք ստեղծելու համար (համապատասխանաբար` 6, 72 և 6, 47 միավոր` 10 բալանոց սանդղակով) և Լեռնային Ղարաբաղին միջանկյալ կարգավիճակի տրամադրում` անվտանգության և ինքնավարության երաշխավորման պայմանով (5, 62 միավոր 10 բալանոց սանդղակով), այնքանով, որքանով դրանք հակամարտության համակողմանի խաղաղ կարգավորման մաս են կազմում: Հայաստանի և Ադրբեջանի միջև կնքված ժամանակավոր ռեժիմի ամրապնդման, այսինքն` դիպուկահարների հեռացման և շփման գծի երկայնքով միջազգային դիտորդների տեղակայման կողմնակիցների թիվը Հայաստանում բարձր է (երկրորդ ավելի նախընտրելի տարբերակն է. 6, 72 միավոր 10 բալանոց սանդղակով): Հարցվողները համոզված են, որ դա կնվազեցնի հայ և ադրբեջանցի զոհերի թիվը շփման գծում (71%), կնվազեցնի պատերազմի վտանգը (64%) և կհեշտացնի ԵԱՀԿ-ի` խաղաղության բանակցությունների գործընթացը (66%):
