Հրայր Թովմասյանը չի կարող լինել ՍԴ նախագահ՝ իր ֆեյսբուքյան էջում գրառում է արել վարչապետ Նիկոլ Փաշինյանը, որը Բանակի օրվա առիթով Եռաբլուրում պատասխանելով լրագրողների հարցին՝ նշել էր, որ ՍԴ-ի շուրջն իրավիճակը կհանգուցալուծվի շուտով: Նիկոլ Փաշինյանը, սակայն, չի հայտնել մանրամասներ, թե ինչ ճանապարհի մասին է խոսքը: Նա չի՞ բացում խաղաքարտերը, թե՞ առայժմ կա հանգուցալուծման «շուտով» տարբերակի վերաբերյալ քննարկում, սակայն կայացված չէ որոշում:
Մի բան աներկբա է՝ դիմակայությունն իսկապես մտնում է չափազանց սուր մի փուլ, որտեղ իշխանությունը, առնվազն վարչապետի հայտարարությամբ, բավականին սեղմել է խաղի իր ժամանակը: Մյուս կողմից էլ՝ Հրայր Թովմասյանն է էապես փակել իր նահանջի որևէ ճանապարհ:
Այդ ֆոնին հրապարակվեց երկրորդ նախագահ Ռոբերտ Քոչարյանի հարցազրույցը, որտեղ նա խոսում էր ընդդիմադիր մոբիլիզացիայի մասին՝ իրեն դիտարկելով դրա, այսպես ասած, առաջնորդության հիմնական հավակնորդ, շրջանառելով նաև 2020 թվականի ընթացքում արտահերթ ընտրության բարձր հավանականության միտքը:
Ընդ որում, հատկանշական է այն, որ երկրորդ նախագահը խոսում էր «բանտից պայքարի» մասին՝ հիշատակելով, որ պատմությանը հայտնի են այդպիսի բազում օրինակներ: Երկրորդ նախագահի հարցազրույցի այդ բաղադրիչի տողատակում նշմարվում էր որոշակի համակերպվածություն այն մտքի հետ, որ ազատության մեջ հայտնվելու հեռանկարը մոտ չէ: Այդ հանգամանքը հատկանշական է ՍԴ իրավիճակի ֆոնին՝ հաշվի առնելով այն, որ Ռոբերտ Քոչարյանի համար Սահմանադրական դատարանն էր ազատության մեջ հայտնվելու թերևս հիմնական մեխանիզմը՝ Պուտինի աջակցության տարբերակի ֆիասկոյից հետո: Սակայն եթե հանգուցալուծվի ՍԴ-ի շուրջը ստեղծված իրավիճակը, ապա դա կնշանակի, որ չեղարկվում է նաև ՍԴ մեխանիզմով ազատության մեջ հայտնվելու հնարավորությունը:
Հատկանշական է, որ Նիկոլ Փաշինյանը վերջին օրերին դարձյալ սրելով ՍԴ-ի շուրջը խնդիրը՝ այն առավել կենտրոնացրել է հենց Հրայր Թովմասյանի վրա, ստեղծելով տպավորություն, որ դատավորների նախկինում ձևավորված կազմի մնացյալ մասի առումով իշխանությունը չի տեսնում խնդիր: Իսկ արդյոք Ռոբերտ Քոչարյանն այդտեղ տեսնո՞ւմ է իշխանության և նախկին իշխանության որևէ թևի մեջ որևէ փոխզիջում՝ միայն Հրայր Թովմասյանի հեռանալու շուրջը, որից փաստացի միակ տուժողը կամ կորցնողը կարող է լինել Ռոբերտ Քոչարյանը:
Լուսանկարը՝ Armeniasputnik-ի
