Իսրայելական մամուլն իր վերջին օրերի հրապարակումներում անդրադարձ է կատարել Հայաստանի Հանրապետության նախագահ Արմեն Սարգսյանի՝ Իսրայելի Պետություն աշխատանքային այցին, որի շրջանակում Հանրապետության նախագահը մասնակցել է Հոլոքոսթի հիշատակին նվիրված 5-րդ միջազգային համաժողովին:
Մասնավորապես՝ առաջատար «Երուսաղեմ փոստ» օրաթերթը գրում է, որ Իսրայելի մայրաքաղաք այցելած առաջնորդների թվում էր նաև Հայաստանի Հանրապետության նախագահ Արմեն Սարգսյանը, որն առաջին անգամ էր Իսրայելում որպես ՀՀ նախագահ: Պաշտոնական միջոցառումներից և Իսրայելի ղեկավարության հետ հանդիպումներից բացի, Հայաստանի նախագահն այցելել է նաև Հոլոնի տեխնոլոգիական համալսարան, որտեղ ակադեմիական համագործակցության զարգացման մասին փոխըմբռնման հուշագիր է ստորագրվել համալսարանի նախագահ Էդուարդ Յակուբովի հետ:
Պարբերականը մեջբերել է մի հատված համալսարանում նախագահ Սարգսյանի ելույթից. «Պատմության շատ էջեր ողբերգական են հայ և հրեա ժողովուրդների համար։ Մենք սգում և հիշում ենք բոլոր այն միլիոնավոր մարդկանց մահը, որոնք զրկվել են իրենց կյանքից Հոլոքոսթի և Հայոց ցեղասպանության ժամանակ»:
Օրաթերթը տեղեկացրել է նաև համալսարանում Հայաստանի նախագահի ներկայացրած՝ «Աշխարհաքաղաքական իրողությունները արհեստական բանականության դարաշրջանում» թեմայով դասախոսության մասին:
«Երուսաղեմ փոստ»-ի նյութն արտատպվել է Ifatmediasite.com հարթակում:
Հայաստանի նախագահը բացառիկ հարցազրույց է տվել նաեւ Իսրայելի հանրային հեռարձակող ընկերությանը, որտեղ, խոսելով Հայոց ցեղասպանության ճանաչման մասին, ասել է. «Ես ճանաչում եմ շատ հրեա քաղաքական գործիչների, ովքեր սատարում են ճանաչման գործընթացին: Ես չեմ տեսնում որևէ պատճառ, թե ինչու Իսրայելի խորհրդարանը չպետք է ճանաչի Հայոց ցեղասպանությունը: Եթե պատճառը ներկայիս քաղաքական շահերը, քաղաքական հարաբերությունները կամ ապագայի քաղաքական, միգուցե, նաև տնտեսական շահերն են, դա ինձ շատ է տխրեցնում, քանի որ Հոլոքոսթի և Հայոց ցեղասպանության դասերը մեզ սովորեցնում են, որ չկա որևէ բան, հանուն որի կարելի է զիջել՝ թույլ տալով, որ նման դեպքերը նորից կրկնվեն»:
