Facebook ընկերությունը խոստովանել է, որ հետևում է, թե իր օգտատերերն ինչ են անում համացանցում։ Այս մասին ասվում է նրանց կորպորատիվ կայքում։ Ինչպես հայտարարել են ընկերությունում, Facebook-ը բիզնեսի համար գործիքներ է կիրառում և վերլուծում է նրանց գործողությունները, ովքեր սոցցանց չեն մտնում, սակայն տեղեկատվություն են ստանում համացանցի այլ աղբյուրներից։ Մասնավորապես, հետազոտվում են ինչ-որ ապրանքներ փնտրելու, դրանք զամբյուղի մեջ ավելացնելու, գնումների, ինչպես նաև նվիրատվությունների վերաբերյալ տեղեկությունները։
«Առաջիկա տասնամյակում մեր գլխավոր նպատակներից մեկը Facebook-ում բոլորի համար գաղտնիության առավել հուսալի պաշտպանություն ապահովելն է»,- նշել են ընկերությունում։
Նշվում է, որ այս գործողության շնորհիվ օգտատերերը կկարողանան ղեկավարել վերլուծության համար տրամադրվող ինֆորմացիան, այսինքն մաքրել պատմությունը և այլն։
«Գալիք մի քանի շաբաթների ընթացքում մենք հրավերներ կուղարկենք աշխարհում ավելի քան 2 միլիարդ մարդու՝ դիտելու իրենց գաղտնիության կարգավորումները։ Հրավերը կերևա նորությունների ժապավենում և կուղղորդի դեպի կոնֆիդենցիալության ստուգման գործիքը», ասվում է հայտարարության մեջ։
