«Որքանով որ տեղյակ եմ, դատախազությունը նաև ուսումնասիրում է այդ գործի հետ կապված որոշակի հանգամանքներ, և փորձում ենք հասկանալ իրական պատճառները: Արժի սպասել նաև դատախազության արձագանքին և դիրքորոշմանը»,-անդրադառնալով հեղաշրջման փորձի հետ կապված ԱԱԾ և ԱԽ քարտուղարի իրարամերժ հայտարարություններին՝ «Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Արման Բոշյանը: Հարցին՝ այս փուլում տեսնու՞մ եք հեղաշրջման փորձ և տարբեր խմբերի կողմից մտայնություն, պատգամավորը նշեց.«Իհարկե, ես տեսնում եմ հեղափոխության գաղափարների ժխտման, արժեքների զրոյացման ուղղությամբ հստակ պլանավորված և մի քանի կենտրոններից ուղղորդված պրոցես: Դա հստակ է, և սա ոչ միայն կառավարող ուժը կամ քաղաքական գործիչներն են տեսնում, այլ տեսնում են նաև մեր քաղաքացիները»: