ՀՀ ԱԺ պատգամավոր Շիրակ Թորոսյանը, «Առաջին լրատվական»-ի հետ զրույցում անդրադառնալով Վրաստանի խորհրդարանի կողմից ընդունած որոշումից հետո (որը սեփականության իրավունք է տալիս այդ երկրում գործող բոլոր կրոնական կազմակերպություններին, այդ թվում հայ եկեղեցուն) սկսված հակահայկական հիստերիային, հայտնեց. «Եթե ամեն բան թողնենք այս վիճակում, ապա լարվածությունը խորանալու է։ Սա ո՛չ մեր, ո՛չ էլ Վրաստանի առողջ մտածող զանգվածի համար ցանկալի իրավիճակ չէ, և հիմա մենք պետք է լրջորեն վերանայենք հայ-վրացական հարաբերությունները, որոնք այս վիճակով գրեթե խնդիրներ չեն լուծում։ Այն ձևաչափը, որ մենք այսօր ընտրել ենք հայ-վրացական հարաբերություններում, չի մեղմում լարվածությունը»։
Պատգամավորի խոսքով՝ պետք է այլ քաղաքականություն դրսևորել Վրաստանի հետ հարաբերություններում.
«Խնդիրը Վրաստանում առկա տրամադրվածությունների մեջ է, որոնք կան և՛ իշխանության, և՛ հոգևոր դասի, և՛ հասարակության մեջ։ Մենք պետք է կարողանանք ուժեղ երկրի դիրքերից հանդես գալ։ Այսօր մենք Վրաստանի հետ հարաբերվում ենք որպես երկրի, որը մեր դարավոր դրկիցն է, գտել ենք, որ նրա հետ պետք է բարեկամական հարաբերություններով երկար ճանապարհ անցնենք, բայց այդ տեսանկյունից մենք հաճախ անտեսում ենք այնտեղ ապրող հայության վիճակը և շատ հաճախ տուրք ենք տալիս այն գործոնին, որ մենք Վրաստանից կոմունիկացիոն կախվածության մեջ ենք, իսկ սա վրաց իշխանությունները օգտագործում են։
Շիրակ Թորոսյանը նաև առաջարկեց. «Պետք է հայ-վրացական իրական հարաբերություննեերի մեր տեսլականն ի ցույց դնենք և մշտապես առաջ քաշենք վիրահայության հիմնախնդիրների լուծման հարցերը, ինչն էլ կկարողանա իրական հայ-վրացական բարեկամություն ձևավորել»։
