«Մեծ աղմուկ ոչնչից»,- «Առաջին լրատվական»-ի հետ զրույցում Կենտրոնական բանկի նախկին նախագահ, տնտեսագետ Բագրատ Ասատրյանը այսպես որակեց վարչապետ Փաշինյանի հայտարարության շուրջ բարձրացված աղմուկը։
Հիշեցնենք, որ հունվարի 6-ին Հայաստանի վարչապետ Նիկոլ Փաշինյանի կատարած ֆեյսբուքյան գրառումը Հայաստանից բացի արձագանք ունեցավ նաև հարևան Վրաստանում: Խոսքը վերաբերում է Հայաստանում 1 շնչին բաժին ընկնող ՀՆԱ-ի ցուցանիշին, որով Փաշինյանի գրառման համաձայն՝ Հայաստանն առաջ է անցել Վրաստանից, իսկ 2020 թ-ին առաջ կանցնի նաև Ադրբեջանից։
ՀՀ վարչապետն այս ամենը հաստատում է Արժույթի միջազգային հիմնադրամի տվյալներով, որոնց համաձայն 2019 թ-ի ցուցանիշներով ընթացիկ գներով Հայաստանի ՀՆԱ-ն կազմում է 4․527 դոլար, իսկ Վրաստանի ՀՆԱ-ն՝ 4․289:
Փաշինյանի այս գրառմանն ի պատասխան Վրաստանի նախկին նախագահ Միխեիլ Սաակաշվիլին իր ֆեյսբուքյան էջում ուղիղ հեռարձակմամբ մասնավորապես ասել էր․
«ՀՀ վարչապետ Նիկոլ Փաշինյանը հայտարարել է, թե մեկ շնչին ընկնող ՀՆԱ-ի ցուցանիշով Հայաստանն առաջին անգամ առաջ է անցել Վրաստանից, բայց նման բան երբեք տեղի չի ունեցել ՀՀ մեծ տիրակալից՝ Տիգրան Մեծից հետո։ Աշխարհագրության, ռեսուրսների առումով որևէ հիմք չկա, որ հայաստանցին ավելի շատ ստանա, քան վրաստանցին»։
Մինչդեռ Բագրատ Ասատրյանի դիտարկմամբ՝ Արժույթի միջազգային հիմնադրամի այդ տվյալներն իրական են, իսկ վարչապետի գրառումը պարզապես թյուրընկալումների առիթ է դարձել։
«Նիկոլ Փաշինյանն ընդամենը մեջբերում է կատարել Արժույթի միջազգային հիմնադրամի մակրոտնտեսական ցուցանիշների վերաբերյալ հրապարակումը, որն այդ կառույցը պարբերաբար կատարում է ասիական և կովկասյան երկրների վերաբերյալ և որոնք բաց ու հասանելի ձևով տեղադրված են նաև այդ կազմակերպության պաշտոնական կայքում։ Որևէ արտառոց երևույթ ես այստեղ չեմ տեսնում, սակայն, այսուամենայնիվ, ինչ ասես, թե չխոսվեց այդ գրառման մասին և այդ ամենի մեջ ամենացավալին ոմանց կողմից շահարկումներն են։ Եթե այս ցուցանիշներով ուզում են չափել մեր քաղաքացիների կյանքի որակը կամ չգիտեմ այլ բաներ, ապա, իհարկե, դա միանգամայն սխալ է, որովհետև ՀՆԱ-ի ցուցանիշն ընդամենը ՀՆԱ-ի ցուցանիշ է և որով այո, այդ տվյալների համաձայն Հայաստանը գերազանցելու է թե´ Վրաստանին, թե´ Ադրբեջանին, բայց, բնականաբար, պետք չէ դրանից ավելորդ ենթադրություններ կամ եզրակացություններ անել մեր տնտեսության վիճակի և սոցիալական պայմանների մասին, քանի որ մասնագիտական տիրույթում դա ոչինչ չասող երևույթ է և իրականում չի արտացոլում այն ամբողջականությունը, որը տիրում է այդ երկրներում»,-ընդգծեց մեր զրուցակիցը։
Մանրամասները՝ տեսանյութում։
