Ամերիկայի գավաթի խաղարկության քառորդ եզրափակիչում Ուրուգվայի հավաքականը ետխաղյա 11-մետրանոցներով պարտության մատնեց մրցաշարի գլխավոր ֆավորիտ Արգենտինայի ընտրանուն և դուրս եկավ կիսաեզրափակիչ:
Երկու թիմերն էլ շատ ակտիվ սկսեցին հանդիպումը: Արդեն 6-րդ րոպեին Պերեսը բացեց հաշիվը: Բատիստայի սաներից 12 րոպե պահանջվեց այն հավասարեցնելու համար. Մեսսիի անցումից ու հրաշալի փոխանցումից հետո Իգուաինը գլխի հպումով գնդակն ուղարկեց Մուսլեռայի դարպասը:
Պատասխան գոլից հետո արգենտինացիները շարունակում էին ճնշում գործադրել մրցակցի դարպասներին: Շուտով Մեսսիի փոցանցումից հետո Իգուաինը երկրորդ անգամ գրավեց Մուսլեռայի դարպասը, սակայն «Ռեալ»-ի հարձակվողը խաղից դուրս վիճակում էր: 39-րդ րոպեին, երկրորդ դեղին քարտը ստանալուց հետո, խաղադաշտից հեռացվեց առաջին գոլի հեղիանակ Պերեսը: Առաջին խաղակեսի վերջին րոպեին Ուրուգվայը հաշվի մեջ առաջ անցնելու հրաշալի հնարավորություն կորցրեց: Ֆորլանի փոխանցումից հետո Կասերեսի` մոտ 15 մետրից կատարած հարվածը ետ մղվեց դարպասաձողից:
Ընդմիջումից հետո խաղի պատկերը չփոխվեց. Բատիստայի սաները գնալով ուժեղացնում էին ճնշումը, իսկ ուրուգվայցիները` գրագետ պաշտպանվում ու փորձում հակագրոհի նետել իրենց առաջատարներին` Ֆորլանին և Սուարեսին: Վտանգավոր պահերը մի քանի հանդիպման կբավականացնեին, սակայն գոլեր չկային: Լրացուցիչ ժամանակը թիմերը սկսեցին հավասար կազմերով. 87-րդ րոպեին Մասկերանոն նույնպես ստացավ երկրորդ դեղին քարտն ու հեռացվեց խաղադաշտից:
Լրացուցիչ առաջին խաղակեսում Իգուաինը կարող էր հաղթական գոլի հեղինակը դառնալ, սակայն նրա հարվածից հետո գնդակը դիպավ դարպասաձողին: Արգենտինա-Ուրուգվայ` 1:1, ետխաղյա 11-մետրանոց հարվածաշար, որտեղ Բատիստային «քաշեց», ամբողջ մրցաշրի ընթացքում դժգույն ֆուտբոլ ցուցադրած, այս խաղում էլ անհաջող փոխարինման մտած Կառլոս Տևեսը:
Ուրուգվայը հաղթեց 5:4 հաշվով և դուրս եկավ կիսաեզրափակիչ, Արգենտինան ևս 4 տարով երկարաձգեց Copa America-ում իր առանց հաղթանակների շարքը` այն հասցնելով 22 տարվա:
