Աբխազիայում երկրի ընդդիմությունը բողոքի ակցիաներ է կազմակերպել: Նրանք արգելափակել են երկրի նախագահական և խորհրդարանական աշխատակազմերի շենքը: Աբխազիայում նախագահի և խորհրդարանի աշխատակազմերը գործում են նույն մասնաշենքում: Ընդդիմության ավելի քան 200 ներկայացուցիչներ ներխուժել են շինություն և ոչ ոքի ներս չեն թողել՝ արգելափակելով դռները: Ընդդիմադիրները պահանջում են գործող նախագահ Ռաուլ Խաջիմբիի հրաժարականը:
Հայտնի է, որ Աբխազիան ունի մեծաթիվ հայ համայնք, խորհրդարանում կա հայազգի երկու պատգամավոր։ Համայնքի ղեկավար Գալուստ Տրապիզոնյանի հետ կապ հաստատել չհաջողվեց։ Իրավիճակը մեզ ներկայացրեց Աբխազիայի հայ համայնքի անդամ Խաչիկ Մինասյանը։ Մեր խոսակցության պահին, նրա փոխանցմամբ, ընդդիմադիր ուժերը դեռ զավթած էին պահում նախագահի նստավայրը, իսկ նախագահի կողմնակիցները պատրաստվում էին հավաքվել կառավարության շենքի դիմաց և հանրահավաք իրականացնել:
«Ընդհանուր առմամբ իրավիճակն այս պահին հանգիստ է, ընդդիմադիրները պահանջում են նախագահի հրաժարականը։ Խորհրդարանը որոշում է ընդունել, որով դիմել է նախագահին ինքնակամ հրաժարականի համար. նա մերժել է։ Ցուցարարները համարում են, որ ԿԸՀ-ն սխալ որոշում ու հաշվարկ է արել»,- «Առաջին լրատվական»-ի հետ զրույցում ասաց նա։
Արդյոք հայերը մասնակցո՞ւմ են բողոքի միջոցառումներին՝ հարցին ի պատասխան Մինասյանն ասաց. «Համայնքը որևէ որոշում չունի, առանձին հայեր կան երկու կողմերից էլ։ Մեր պատգամավորների հետ խոսել եմ՝ իրավիճակն այդպիսին է, համայնքի միասնական հայտարարություն չկա»։