Տարին սկսվեց տարածաշրջանային լարվածությամբ՝ Իրան-ԱՄՆ դիմակայությամբ: Պաշտոնական Երևանից հնչեցին չեզոք, համակարգված արձագանքներ:
Քաղաքական դասընթացների երևանյան դպրոցի տնօրեն Արմեն Զաքարյանը այս առնչությամբ «Առաջին լրատվական»-ի հետ զրույցում նշեց. «Հայաստանի կարծիքը չէին էլ հարցնում՝ բացի մեկ զանգից, որ Իրանի արտգործնախարար Զարիֆն ունեցավ մեր արտգործնախարար Զոհրաբյանի հետ: Թե ինչ են խոսել՝ այնքան էլ հայտնի չէ»:
Մեր զրուցակցի խոսքով՝ հաշվի առնելով այն հանգամանքը, որ Զարիֆը հեռախոսազրույցներ է ունեցել իր հարևան բոլոր երկրների արտգործնախարարների հետ, պետք է կարծել, որ դրանք եղել են ընդհանուր կոնսուլտացիաներ, որոնք ունեին դիվանագիտական բովանդակություն՝ էսկալացիայի հնարավորությունը սահմանափակելու համար:
Անդրադառնալով պաշտոնական Երևանի հայտարարությանը՝ Արմեն Զաքարյանը նկատեց. «Հայաստանն իր հայտարարությամբ ընդգծել էր ոչ միայն Սոլեյմանիի սպանությունը, այլ նաև միտինգավորների հարձակումը ամերիկյան դեսպանատան վրա: Այսինքն՝ նաև ամերիկյան կողմին է ասվել, որ չեն ողջունում իրաքցիների հարձակումը ամերիկյան դեսպանատան վրա: Մյուս կողմից էլ՝ չեն ողջունում Սոլեյմանիի սպանությունը»:
Դիտարկմանը՝ իսկ ինչպե՞ս պետք է արձագանքի Հայաստանը ՄԱԿ-ում Իրանի կողմից ԱՄՆ-ի դեմ պատրաստվող բանաձևին, մեր զրուցակիցն ասաց. «Իհարկե, մեզ համար լավագույնը կլիներ իրանաամերիկյան սերտ համագործակցությունը, իսկ հիմա մենք կանգնելու ենք երկընտրանքի առաջ: Իմ կարծիքով՝ Հայաստանը չեզոքության դիրքերից պետք է փորձի հանդես գալ, բայց եթե դա չստացվի՝ Հայաստանը… չգիտեմ»:
Արմեն Զաքարյանը, վկայակոչելով Թրամփի հայտարարությունը 2 տրիլիոն դոլարի զենք ունենալու մասին, նշեց. «Ցավալիորեն, մենք հեռանում ենք այն աշխարհից, որը իրավունքի վրա էր հիմնված: Հիմա, երբ զենքով կարելի է հարց լուծել, իրավունքը մնում է զենքի ստվերում: Հետևաբար Հայաստանը պետք է հաշվի առնի ոչ միայն միջազգային իրավունքի գերակայության հանգամանքը, այլև միջազգային ծանրքաշային խաղացողների կողմից միջազգային իրավունքը ոտնահարելու արդյունքում առաջանալիք իրավիճակը»:
Հարցազրույցն ամբողջությամբ՝ տեսանյութում: