Միացյալ Նահանգները խոստովանում է, որ Մերձավոր Արևելքում խաղաղ կարգավորման գործընթացը նորից լրջորեն առկախվել է, սակայն համաձայն չէ, որ ներկայիս բանակցություններն Իսրայելի և Պաղեստինի միջև ավարտվել են ձախողմամբ՝ հայտնում է ITAR-TASS-ը:
Այս մասին ապրիլի 25-ին հայտարարել է ԱՄՆ պետդեպարտամենտի ներկայացուցիչ Ջեն Պսակին, ով իրավիճակը բնորոշել է որպես «անցումային պահ» և «սպասման շրջան»:
Նրա խոսքով՝ այժմ մերձավորարևելյան գործընթացում սկսվել է այնպիսի փուլ, որ իսրայելցիներն ու պաղեստինցիները «ստիպված են ընդմիջում վերցնել» և պետք է «որոշեն՝ ինչ անել հետո»: «Նրանք իրենք պետք է որոշումներ ընդունեն և գնան դեպի խաղաղություն»,- նշել է Պսակին: Նա նաև պնդել է, որ չնայած բանակցությունների դադարեցմանը՝ «գործընթացը շարունակվում է»:
Իսրայելի և Պաղեստինի միջև խաղաղ բանակցությունները վերսկսվել էին 2013-ի հուլիսին: Դրանք պետք է տևեին առնվազն մինչև ապրիլի 29-ը:
Հիշեցնենք, որ ավելի վաղ Իսրայելի վարչապետ Բենիամին Նեթանյահուն ի պատասխան ՖԱԹՀ-ի և ՀԱՄԱՍ-ի հաշտեցման՝ հայտարարել էր պաղեստինցիների հետ բանակցությունների դադարեցման մասին:
Ռուսաստանի ԱԳՆ-ը հայտարարել է, որ «իսրայելա-պաղեստինյան բանակցությունների դադարեցումը չի կարող բարդություններ չառաջացնել»:
