«Ժողովուրդ»-ի հետ զրույցում, ԱԻՄ նախագահ Պարույր Հայրիկյանի դեմ մահափորձի գործով 14 տարի ազատազրկման դատապարտված Խաչատուր Պողոսյանն ասել է, որ ԱԱԾ քննչական վարչության պետ Մնացական Մարուքյանը սպառնում է իր կնոջը: Այս պատմությունից, ըստ Խաչատուրի, շահեց երեք հոգի՝ Պարույր Հայրիկյանին պետք էր փողը, Սերժ Սարգսյանին՝ իբր թե իր երկրում արդարություն կա, իսկ Մնացական Մարուքյանն էլ մեդալ ստացավ գործը բացահայտելու համար:
«Ժողովուրդ»-ին հաջողվել է զրուցել Խաչատուր Պողոսյանի հետ, ով ուշագրավ մանրամասներ է պատմել: Խաչատուրի խոսքով՝ իրեն այս պատմության մեջ ներքաշել է իր ընկեր Սամվելը. «Խնդրեց, որ օգնեմ ու ասեց՝ հետո կասի: Մենք մահափորձ չենք ցանկացել անել, այլ, պարզապես, ցանկացել ենք վախեցնել, որ հետո Սամվելը էպոսագետից փող պոկեր՝ ասելով, թե եթե գումարը չտաս՝ Հայրիկյանին կասեմ»:
Ըստ թերթի զրուցակցի՝ մինչ այս դեպքը, ինքը որևէ քաղաքական գործընթացի մեջ չի եղել, որևէ կուսակցության կամ քաղաքական գործչի հետ առնչություն չի ունեցել: Միայն փողի դիմաց, էպոսագետի համար նախագահական ընտրությունների ընթացքում տեղեկատվական բուկլետներ է տարածել:
Խաչատուրի պատմելով՝ կատարվածից հետո, երբ իրենց ձերբակալել և տարել են Ազգային անվտանգության ծառայություն, ԱԱԾ քննչական վարչության պետ Մնացական Մարուքյանն իրենց 2 ժամ համոզել է, որ գրեն իր ուզածը. «Ասում էր, եթե ՀՀ նախագահի թեկնածու Վարդան Սեդրակյանը բերի գումարները տա, բոլորիդ բաց կթողնենք: Այս պատմությունը մի բանի համար սարքվեց: Վարդան Սեդրակյանը պարտք է Սերժ Սարգսյանին, ավելի կոնկրետ՝ նրա բարեկամ Ալիկ Աբրահամյանին: Մեզ Մարուքյանը զոռով գրել էր տալիս, թե ինչ ասեմ Սեդրակյանի դեմ պիտի գրեք, նրա անունը պիտի տաք, եթե չգրեք, ձեր կանանց կդատենք: Իմ կնոջն էլ, Սամվելի կնոջն էլ ձերբակալել էին: Ես նրանց ասեցի՝ թողեք կանանց ու մենք կպայմանավորվենք: Այս մասին դատարանում ասեցի, բայց հաշվի չառան: Եթե հաշվի առնեին, կծիկը կբացվեր: Մարուքյանը պահանջում էր միայն Սերժ Սարգսյանի գումարը, որը կրկնում եմ՝ Սեդրակյանն էր պարտք, ուրիշ հարց չկար այստեղ:Հարյուր տոկոս սրա համար սարքվեց»:
Մանրամասները՝ թերթի այսօրվա համարում
Լուսանկարը` PanARMENIAN Photo-ի
