Քոչարյանն այս պայքարում ներկայացնում է իրեն և ոչ՝ Կրեմլը: «Առաջին լրատվական»-ի հետ զրույցում այս մասին ասաց Ռուսաստանի Դաշնության 1-ին կարգի պետական խորհրդական, քաղաքագետ, Rex գործակալության ղեկավար Մոդեստ Կոլերովը՝ անդրադառնալով Հայաստանի՝ ՄՄ-ին միանալու ժամկետների ձգձգմանն ու ՀՀ երկրորդ նախագահ Ռոբերտ Քոչարյանի հերթական հարցազրույցին:
Նա նշեց, որ երեկ ՀՀ երկրորդ նախագահ Ռոբերտ Քոչարյանի ելույթը փայլուն էր, բայց փաստում էր ոչ թե քաղաքականություն նրա վերադարձի մասին, այլ քաղաքականությունից հեռանալու: Նրա համոզմամբ՝ այս պայքարում Քոչարյանն իրեն է ներկայացնում և ոչ՝ Կրեմլը: «Կրեմլը հայաստանյան ներքաղաքական դաշտում չի աշխատում»,- նշեց նա՝ հավելելով, որ դաշտում յուրաքանչյուրը համարձակվում է և պատասխանատվություն կրում ինքնուրույնաբար:
Անդրադառնալով ՀՀ էկոնոմիկայի նախկին նախարար Վահրամ Ավանեսյանի դիտարկումներին, թե Հայաստանը միանգամից կստորագրի Եվրասիական տնտեսական միությանը միանալու փաստաթուղթն առանց միանալու Մաքսային միությանը՝ քաղաքագետն ասաց, որ վաղուց է ասել, թե Հայաստանում պահպանվել է Մաքսային միության հետ հնարավորինս երկար առևտուր անելու ցանկությունը: Սակայն, նրա համոզմամբ, Ավանեսյանի մակարդակը շատ ցածր է, որպեսզի Մոսկվան դրան համարժեք արձագանք տա:
«Օրինակ՝ մինչ այսօր նույնիսկ չի հերքվել 2013թ. օգոստոսին ԱԳ փոխնախարար Շ. Քոչարյանի հայտարարությունն այն մասին, որ Մոսկվան ճնշում է ու ստիպում անդամակցել Մաքսային միությանը: Այնպես որ՝ սպասենք Հովիկ Աբրահամյանի հայտարարությանը: Եթե նա հաստատի Հայաստանի այդ նոր դիրքորոշումը, ապա հաստատ կարելի է ասել, որ Հայաստանը Եվրասիական միության երես չի տեսնի»,- ասաց Կոլերովը:
Ադրբեջանի գործոնից խոսելով՝ Կոլերովն ասաց, որ այն եղել է միշտ՝ սկսած 2013թ. սեպտեմբերի 3-ի Սերժ Սարգսյանի հայտարարությունից: «Սա արդեն ստացել է իր գնահատականը՝ այն որևէ կերպ չի կարող խոչընդոտել Հայաստանի անդամակցությանը ՄՄ-ին: Ադրբեջանն այն վիճակում չէ այսօր, որ իր համար արտաքին քաղաքական արկածներ փնտրի: Այնպես որ՝ պատճառները Երևանի ներսում են, և դրանց անունն է առևտուր և բազմավեկտորություն»,- ամփոփեց իր խոսքը Մոդեստ Կոլերովը:
Հիշեցնենք, որ ՀՀ էկոնոմիկայի նախարարի պաշտոնակատար Վահրամ Ավանեսյանն ասել էր, թե հնարավոր է՝ Հայաստանը չստորագրի Մաքսային միությանն անդամակցելու փաստաթուղթը, այլ միանգամից ստորագրի Եվրասիական տնտեսական միությանը միանալու պայմանագիրը, ապա հստակեցրել էր, որ ապրիլի 29-ին չի նախատեսվում Մաքսային միությանը Հայաստանի անդամակցության փաստաթղթի ստորագրում, և որ իր մեղքով է սխալ տեղեկատվություն տարածվել:
