«Էրդողանի հայտարարությունը սովորական թրքություն է, ընդհանուր, ոչինչ չասող տեքստ: Դրա հետ ոչ մի հույս կապել չի կարելի»,- այսօր «Առաջին լրատվական»-ի հետ զրույցում ասաց ՀԺԿ քարտուղար Ֆելիքս Խաչատրյանը:
Անդրադառնալով ներքաղաքական հարցերին, նոր կառավարության ձևավորմանը՝ Խաչատրյանը չցանկացավ նոր կառավարությանը «վատ բան ասել»: «Թող աշխատեն մի քիչ, կտեսնենք: Ես, անկեղծ ասած, կարծում եմ, որ ոչինչ չի փոխվի: Կառավարություն փոխելով՝ երկրի վիճակ չես բարելավի: Կառավարության վերևին, կառավարության նշանակողին պետք է փոխել: Մեր դժբախտությունը վերևում նստածն է: Ընդհանուր քաղաքականությունը պետք է փոխվի: Իշխանությունը պետք է դեմքով շուռ գա դեպի ժողովուրդը»,- ասաց Խաչատրյանը:
Կարողանա՞ օլիգարխ, բիզնեսմեն վարչապետը երկիրը դուրս բերել տնտեսական ճգնաժամից՝ հարցրինք Խաչատրյանին: «Սերժ Սարգսյանը ցուցակները կազմելուց ասում էր, որ մեր ցուցակում օլիգարխ չկա: Բայց մենք հո իրականությունը լավ գիտենք: Ուտելուն, կշտանալուն էլ չափ կա: Բայց թող աշխատի՝ կտեսնենք»,- ասաց ՀԺԿ քարտուղարը:
Մեր զրուցակիցի խոսքով՝ նոր նախարարների նշանակումը, որոնք, ըստ էության, Քոչարյանի կադրերն են համարվում, չի խոսում այն մասին, որ իշխանությունը որոշ չափով հանձնվում է նաև Քոչարյանին: «Դա խոսում է այն մասին, որ մենք չունենք համապատասխան մարդիկ: Նույն մարդիկ անընդհատ պտտվում են: Քոչարյան, Սերժ Սարգսյան՝ ինչ տարբերություն: Նրանք մեկը մյուսին լրացնում են, ունեն իրենց մաֆիան և անում են իրենց գործը: Իսկ փորձառու, պատրաստված կադրերը մնում են ստվերում»:
Ինչ վերաբերում է Սահմանադրական բարեփոխումների հայեցակարգին, երկրի կառավարման մոդելի փոփոխությանը և այդ ամենին հաջորդած Ռոբերտ Քոչարյանի արձագանքին, ապա Խաչատրյանը կարծում է, որ գործող Սահմանադրությունը հնարավորություն ընձեռում է ամբողջությամբ «լուծել ժողովրդի, հայրենիքի հոգսը»:
«Խնդիրը Սահմանադրության մեջ չէ, խնդիրը Սահմանադրությունը իրականացնողների, խախտողների մեջ է: Ինչ վերաբերում է Քոչարյանի արձագանքին, ապա Քոչարյանը թող հիշի, թե իր ժամանակ Սահմանադրությունը ոնց էր տրորվում, ոնց էր ընտրությունների ժամանակ հենց Հովիկ Աբրահամյանի միջոցով, որն իր շտաբի պետն էր, բռնաբարում Սահմանադրությունը»։
