Թուրքիայի գլխավոր ընդդիմադիր քեմալական «Ժողովրդահանրապետական կուսակցության» պատգամավոր Դենիզ Յավուզյըլմազը Թուրքիայի փոխնախագահ Ֆուաթ Օքթային ուղղված հարցադիմումում պահանջել է պատասխանել, թե Թուրքիան իր սահմանին շատ մոտ գտնվող Մեծամոր ատոմակայանի հարցում ինչ կանխարգելիչ միջոցառումներ է ձեռնարկել միջազգային ասպարեզում և ինչ նախաձեռնություններով է հանդես եկել:
Թուրքիայի փոխնախագահը հարցի վերաբերյալ անհրաժեշտ տեղեկատվություն ստանալու համար դիմել է Թուրքիայի ԱԳՆ և ներկայացրել ստացված պատասխանը: Դրանում նշվել է, որ Մեծամորի ատոմակայանը չի համապատասխանում ժամանակակից անվտանգության պահանջներին: Նշվել է նաև, որ ատոմակայանը վերահսկվում է Ատոմային էներգիայի միջազգային գործակալության (հապավումը՝ ԱՏԷՄԻԳ) կողմից, որը ատոմակայանի վերագործարկման օրվանից սկսած աշխատանքներ է տանում ատոմակայանի կառուցվածքային թերություններից բխող անվտանգության խնդիրները վերացնելու ուղղությամբ:
Հարցին ի պատասխան նշվել է նաև Թուրքիան ատոմակայանը փակելու նախաձեռնությամբ հանդես գալ չի կարող, քանի որ որևէ ատոմակայան փակելու իրավասությունը բացառապես տվյալ երկրին է պատկանում, թեպետ Ատոմային անվտանգության կոնվենցիայի վերանայման ժողովների ժամանակ Թուրքիան ներկայացրել է, որ ատոմակայանը, որը գտնվում է մի տարածաշրջանում, որտեղ բնական աղետներ են լինում, տեղակայված է Թուրքիայի տարածքին շատ մոտ և աշխատում է հին տեխնոլոգիաներով, ռիսկի գործոն է ամբողջ տարածաշրջանի համար:
