Բրիտանացի արքայազն Չարլզի կնոջ՝ Քորնուոլի դքսուհի Կամիլլայի եղբայրը մահացել է Նյու Յորքում գլխի վնասվածքի պատճառով: Այս մասին հայտարարել է զույգի լոնդոնյան նստավայրի՝ Կլարենս Հաուսի պաշտոնական ներկայացուցիչը՝ փոխանցում է ITAR-TASS-ը:
Կամիլլայի եղբայրը՝ 62-ամյա Մարկ Շենդը, գլխի վնասվածք էր ստացել երեքշաբթի՝ Sotheby’s աճուրդի տան կողմից անապահով երեխաների համար կազմակերպված բարեգործական ընդունելությունից հետո: Հաղորդվում է, որ նա սայթաքել և գլխով հարվածել է ասֆալտին:
Շենդը ծայրահեղ ծանր վիճակով հոսպիտալացվել էր, սակայն բժիշկներին չի հաջողվել փրկել նրա կյանքը:
Շենդը հայտնի էր որպես ուղևորությունների մասին գրքերի հեղինակ և շրջակա միջավայրի պահպանության ակտիվ գործիչ:
