«Ամանորին թանգարաններն աշխատելու են, և դա ճիշտ գաղափար է, նախ՝ պահանջարկ կա՝ զբոսաշրջիկները կարող են այցելել, բացի դրանից՝ սեղանների շուրջ նստելը շատ ծանր գործ է, լավ կլինի, որ մարդիկ կտրվեն դրանից: Մենք ողջունում ենք կառավարության այս որոշումը: Ուղղակի մեր ժողովուրդը թանգարաններ գնալ չեն սիրում»,- այս մասին «Առաջին լրատվական»-ի հետ զրույցում ասաց Փարաջանովի տուն-թանգարանի տնօրեն Զավեն Սարգսյանը՝ հավելելով, որ մարդը պետք է հաց ու ջրի քաղցի նման մշակութային քաղց էլ զգա և առնվազն ամիսը մեկ անգամ փորձի այդ քաղցը հագեցնել՝ մշակութային օջախներ այցելելով:
Մեր զրուցակցի դիտարկմամբ՝ սերը դեպի մշակույթը մանկուց պետք է սերմանել: «Մեզ մոտ շատ լավ ծրագիր է իրագործվում, դպրոցականներն այդ ծրագրի շրջանակում սկսել են այցելել թանգարաններ, բայց երեխաների մոտ հիմնականում այնքան էլ լրջություն չկա»:
Զավեն Սարգսյանի կարծիքով՝ մշակութային քաղաքականություն մշակելու համար անհրաժեշտ է նաև դիմել խորհրդատվության՝ ոլորտի ներկայացուցիչների կարծիքն իմանալու համար: «Մշակութային քաղաքականության և մշակութի նկատմամբ վերաբերկունքի առումով դեռևս տրանսֆորմացիա տեղի չի ունեցել, երկիրը գնում է այն ուղղությամբ, որ ուղղությամբ որ գնում էր,- նշեց մեր զրուցակիցը: Նա նաև մտահոգություն հայտնեց այն առումով, որ մեր երկրում արդեն 30 տարի է ոչ մի թանգարան չի կառուցվել, բացի Կոմիտասի թանգարանից, որը պատրաստի շենք էր, «Հայաստան» հիմնադրամի միջոցներով վերանորոգվեց. «Մի քանի անգամ դիմել եմ ղեկավարությանը թանգարան կառուցելու համար: Գործարաններ ունենք, որոնք չեն գործում, վաճառել են չնչին գումարներով, կարելի էր դրանք թանգարաններ դարձնել… Թանգարանը պետության դեմքն է»:
«Երկու տարի առաջ կասեի, որ մշակութային ոլորտի խնդիրները լուծել հնարավոր չէ, – նշեց Զավեն Սարգսյանը,- բայց հիմա հնարավոր է, փառք Աստծո, ունենք ղեկավար, որին հավատում ենք»:
Մանրամասն՝ տեսանյութում:
