Կառավարության որոշմամբ Ստյոպա Սաֆարյանին Հանրային խորհրդի նախագահի պաշտոնում նշանակելուց հետո հանրային շրջանակներում կան ակնկալիքներ, որ այնտեղ էլ կարող է թափանցել նոր Հայաստանի շունչը։
Ինչպե՞ս են պատկերացնում իրենց գործունեությունը Հանրային խորհրդի նոր նախագահի հետ հին անդամները։
Գեներալ-մայոր, Արցախի հերոս Արկադի Տեր-Թադևոսյանը՝ Կոմանդոսը, <Առաջին լրատվական»-ի հետ զրույցում նշեց, որ ինքը ապրիլ ամսից կամավոր դուրս է եկել ՀԽ-ից, քանի որ չի հասկանում, թե այնտեղ ինչ խորհուրդներ պետք է տա։
«Միգուցե խորանամ, ես էլ այնտեղ օգտակար լինեմ, բայց ես իմ գործն ունեմ։ Ես հիմա մասնագետներ եմ պատրաստում, ուղարկում եմ բանակ։ Ժամանակ չունեմ զբաղվելու այն գործերով, որոնք չեմ հասկանում»,- ասաց Կոմանդոսը։
Մեր դիտարկմանը, թե նշանակվել է ՀԽ-ի նոր նախագահ, որը կարող է փոփոխություններ անել, Կոմանդոսն արձագանքեց․ «Ես իրեն լավ ճանաչում եմ, հանդիպել եմ, բայց ես իմ գործից բացի այլ գործով զբաղվելու ժամանակ չունեմ։ Պետք է այնտեղ լինեն այն մարդիկ, որոնք ուզում են օգտակար լինել։ Ես Վազգեն Մանուկյանի հետ էլ եմ աշխատել, հարգանքով եմ վերաբերվում։ Ես այն ժամանակ գնում էի նիստերին, գլուխս թափահարում, ժամանակ կորցնում և վերադառնում։ Կարծում եմ, որ իմ տեղը պետք է ուրիշ մարդ նշանակվի, որն օգտակար կլինի այդ կազմակերպությանը»։
Հանրային խորհրդի անդամ, քաղաքական վերլուծաբան Արծրուն Պեպանյանը կարծում է, որ Հանրային խորհրդում որևէ բան փոխելու անհրաժեշտություն չկա։
«Շատ նորմալ, առողջ կառույց է, այնպես որ՝ ես որևէ փոփոխության կարիքը չեմ տեսնում»,- ասաց նա։
Հարցին, թե ինքը պատրաստվո՞ւմ է շարունակել իր գործունեությունը Հանրային խորհրդում նոր նախագահի օրոք, Արծրուն Պեպանյանն արձագանքեց․ <Հաշվի առնելով, թե մեր իշխանությունները որքան վրիպումներ և սայթաքումներ են թույլ տալիս, ՀԽ-ի գործունեությունը դառնում է խիստ անհրաժեշտ և անհետաձգելի։ Այնպես որ՝ ես փորձելու եմ աշխատել, որքան կհամբերեմ՝ չգիտեմ։ Իսկ ՀԽ-ի նախագահը ընդամենը նիստ է վարում և ունի մեկ ձայնի իրավունք։ Նա ուրիշ լիազորություն չունի։ ՀԽ-ի անդամներն իրավունք ունեն հարց դնել օրակարգում, քննարկել, ՀԽ-ի նախագահը չի կարող ասել՝ ոչ։ Նրա լիազորությունները սահմանափակ են։ Ես ինչ մտածում եմ՝ ասում եմ, անկախ նրանից՝ Վազգեն Մանուկյանը կլինի, Ստյոպա Սաֆարյանը, թե Սողոմոն իմաստունը։ Ես իմ դիրքորոշումն ունեմ՝ ասում եմ»։
