Վրաստանի Պետական անվտանգության ծառայությունը հետաքննում է «Մեեկի» ընկերության գործը, որը պատկանում է խորհրդարանի պատգամավոր Հենզել Մկոյանին: Այս մասին հայտնում է sknews.ge-ն: Վերջին 7 տարիներին Ախալքալաքի ու Նինոծմինդայի պետական մարմինները վառելիք են գնում նրան և նրա ընտանիքին պատկանող ընկերությունից: Մկոյանի ընկերությունը հաղթել է Ախալքալաքի և Նինոծմինդայի բացառապես բոլոր տենդերները և մոտ կես միլիոն լարիի եկամուտ ստացել:
Հենզել Մկոյանն «Առաջին լրատվական»-ին փոխանցեց, որ ինքն այդ ստուգումների մասին մամուլից է իմացել. «Դեռ միայն գրում են, չգիտեմ, թե ինչ ստուգումներ են»։ Մեր այն հարցին, թե արդյոք դրանք կապո՞ւմ է քաղաքական իր գործունեության հետ, Մկոյանը պատասխանեց. «Ոչ մի բանի հետ չեմ կապում»։
«Բազմազգ Վրաստան» նախաձեռնության ղեկավար Առնոլդ Ստեփանյանն «Առաջին լրատվական»-ի հետ զրույցում անդրադառնալով վերը նշված տեղեկություններին՝ ասաց. «Ես, անկեղծ ասած, չգիտեմ՝ ստուգումներ ընթանո՞ւմ են, թե՞ ոչ։ Բայց այն, որ Ախալքալաքում, Նինոծմինդայում, ինչպես նաև մամուլում վերջին շրջանում ակտիվորեն խոսվում է այն մասին, որ տենդերների մեծ մասը հաղթում են այն ընկերությունները, որոնք այսպես թե այնպես պատկանում են Հենզել Մկոյանին՝ փաստ է։ Այդպիսի տեղեկություն իսկապես տարածվում է, բայց ես այն չեմ կարող ո՛չ հաստատել, ոչ էլ հերքել։ Դա այն է, ինչ գրվում է մամուլում, և ինչի մասին խոսում են մարդիկ Ախալքալաքում և Նինոծմինդայում»։
Ըստ Ստեփանյանի՝ այստեղ քաղաքական երանգներ փնտրել պետք չէ. «Սա դժգոհության արդյունք է, որն ունեն Հենզել Մկոյանի ընդդիմադիրները, ընդհանրապես քաղաքական ընդդիմության ներկայացուցիչները և առհասարակ այն սեկտորը, որոնք հիմա այդ հարցի վրա ուշադրություն են դարձնում»։
Մեր զրուցակիցը հավելեց՝ նման հետևանքները միանգամայն սպասելի էին. «Ազգային պատկանելության հետ կապված հետապնդում միանշանակ չկա, դա առհասարակ պետք է բացառվի։ Ես չեմ կարող ասել, որ Վրաստանում ժողովրդավարության մակարդակը փայլուն է, բայց համենայնդեպս այն բավարար է, որ երբ ինչ-որ մի խնդիր հայտնվում է հասարակության ուշադրության կենտրոնում՝ դրանով զբաղվում են համապատասխան մարմինները, այսինքն՝ արձագանք լինում է։ Հետևաբար ընթացող գործընթացը միանգամայն տրամաբանական է»։
Հենզել Մկոյանը, հիշեցնենք, Ախալքալաքից և Նինոծմինդայից մեծամասնական ընտրակարգով ընտրված պատգամավոր է։ Դեռ 2018 թվականի հոկտեմբերին նախընտրական շրջանում հարձակում էր տեղի ունեցել Մկոյանի ընտանիքին պատկանող բենզալցակայանում աշխատող անձանց վրա՝ նախագահի թեկնածու Սալոմե Զուրաբիշվիլիին աջակցելու դեպքում, նրանց սպառնում էին ֆիզիկական հաշվեհարդարով և վնասում Զուրաբիշվիլիի քարոզչական նյութերը: «Սա ինքնաբուխ հարձակում չէր միայն մեկ օբյեկտի վրա: Նույն ավտոմեքենայով տեղաշարժվող անձինք նման հարձակում են իրագործել նաև այլ բենզալցակայանների վրա: Այն բանից հետո, երբ իմ կողմնակիցները հարձակվողներից պահանջել են բացատրություն, մեկնաբանություն, ի պատասխան կրկին ստացել են սպառնալիք և վիրավորանք, որը վերաճել է ֆիզիկական առճակատման»,- այն ժամանակ հայտարարել էր հայազգի պատգամավոր Հենզել Մկոյանը:
