Վերաքննիչ քրեական դատարանն այսօր մերժել է ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ պաշտպանների ավելի վաղ ներկայացրած բողոքը։
Հիշեցնենք՝ նոյեմբերի 7-ին Երևանի ընդհանուր իրավասության դատարանը՝ Աննա Դանիբեկյանի նախագահությամբ, մերժել է Ռոբերտ Քոչարյանի պաշտպանների միջնորդությունը՝ նրա նկատմամբ որպես խափանման միջոց գրավի կիրառումը թույլատրելի ճանաչել։
Ի՞նչ է ենթադրում Վերաքննիչի որոշումը միջնորդությունների այս փուլում: Թեմայի շուրջ «Առաջին լրատվական»-ի հետ քննարկմանը մասնակցեցին քաղաքագետ Արմեն Հովհաննիսյանը, փաստաբան Արա Ղարագյոզյանը և ՀԱԿ իրավական հարցերի պատասխանատու Արմեն Խաչատրյանը:
Արմեն Հովհաննիսյանի դիտարկմամբ՝ քաղաքական այն փուլը, որ կոչում էին թեժ աշուն, ֆիասկո ապրեց՝ քոչարյանական կողմի պարտությամբ: «Այսօրվա դրությամբ ունենք չհաջողված թեժ աշուն, բայց մյուս կողմից՝ հանրության համար կան բացասական հետևանքներ, որովհետև մթնոլորտի շիկացումը, բացասական արժեհամակարգի ընդլայնումը ցնցում է. հեռուստատեսային և ֆեյսբուքյան գործիչներ կան, որոնք կրիմինալ հոգեբանության, մտածելակերպի բացահայտ քաղաքականացմամբ են զբաղված»:
«Քոչարյանի պաշտպանական կողմը այդպես էլ չմտավ դատավարական ընթացքի մեջ,- նկատեց Արմեն Խաչատրյանը,- նախկին իշխանությունները և նրանց արբանյակ ուժերը գուցեև իսկապես պատրաստվում են «պերեվարոտի», և երկրորդ՝ Ռ. Քոչարյանի պաշտպանները ապօրինի ազդեցություն են գործում տուժողների և վկաների վրա, այսինքն՝ ինչքան ձգձգեն դատավարության սկիզբը, այնքան կունենան «մշակված» տուժողներ և վկաներ: Դատական համակարգը հասկացել է, որ այս միջնորդությունները արհեստածին են և անբովանդակ»:
«Մեծագույն վտանգ է, որ նրանք այլ ելք չեն տեսնում քան հեղաշրջումը,- հավելեց Արմեն Հովհաննիսյանը:
Արա Ղարագյոզյանը մտահոգություն հայտնեց՝ կապված Մարտի 1-ի կարևոր վկաների անվտանգության խնդրի հետ. «Վկաների անվտանգության, նրանց պաշտպանության խնդիր կա: Քոչարյանական թիմը փորձում է վախի մթնոլորտ ստեղծել…»:
Մանրամասն՝ տեսանյութում:
