«Վերջերս Մարտի 1-ի գործի քննչական ղեկավար Վահագն Հարությունյանը, անդրադառնալով youtoube.com կայքում հայտնված մարտիմեկյան հոլովակներին, միտք հայտնեց, թե դրանք քննության համար առանձնապես արժեք չեն կարող ներկայացնել մի կողմից, մյուս կողմից՝ դրանց հեղինակները հայտնի չեն: Ի՞նչ եք կարծում, այստեղ կոծկելու միտում չկա՞, թե՞ բերված պատճառներն իրոք արժանահավատ են»: Այս հարցի մանրամասները փորձեցինք պարզել ներքին գործերի, պաշտպանության նախկին փոխնախարար, մարտիմեկյան դեպքերի փաստահավաք խմբի նախկին անդամ Անդրանիկ Քոչարյանից:
– Ակնհայտ է, որ կա քաղաքական սաբոտաժ, միտումնավոր կոծկում, ընդ որում, դա արվում է միայն իշխանությունների հրահանգով, քանի որ նրանք հասկանում են, որ ցանկացած բացահայտում բերելու է շղթայական ազդեցության: Սրա միակ տարբերակն այն է , որ քննչական խումբը պետք է ոչ թե 600 վկա հարցաքններ, այլ պետք է հանգամանքների պարզմամբ նախ որոշեր իշխանության գործողությունների օրինաչափությունը, 0038 հակաօրինական հրամանի հարցը՝ խնդրին ցուցաբերելով համալիր մոտեցում:
Հոլովակների միայն այն հատվածը, որտեղ կան կրակոցներ, որոնք հորիզոնական ուղղվածությամբ են, վկայում է, որ նշանառու կրակ են բացել մարդկանց վրա. դա արդեն իսկ խոսում է այն մասին, որ գործողություններն իրավաչափ չեն, և այս քաղաքական սաբոտաժից դուրս գալու միակ տարբերակն այն է, որ քննչական խումբը լուծարվի և այդ սաբոտաժի համար ենթարկվի պատասխանատվության: Այլ ճանապարհ չկա, և դա պետք է արվի շատ շուտ, որովհետև գործի քննությունը փաստացիորեն կանգ է առել, իսկ հանրության պահանջն է այդ ամենը հասցնել իր տրամաբանական ավարտին: