Սիրիայի նախագահ Բաշար Ասադը հայտարարել է, որ Միացյալ Նահանգները Թուրքիային նավթ է վաճառում իրենց կողմից զավթված սիրիական հանքավայրերից, և որ Անկարան հանդիսանում է Վաշինգտոնի հանցակիցը:
Ասադը չինական Phoenix հեռուստաալիքին տված հարցազրույցում հայտարարել է, որ այդ նույն հանքավայրերն, ավելի վաղ, զավթված էին «Ջեբհաթ ան-Նուսրի» խմբավորման ահաբեկիչների, իսկ այնուհետև նաև «Իսլամական պետության» կողմից:
Նա նշել է, որ նախկինում էլ Թուրքիան անմիջական դեր ուներ ահաբեկիչներից նավթի գնման մեջ, իսկ այժմ այն գնում է Վաշինգտոնից:
Ավելի վաղ ԱՄՆ նախագահ Դոնալդ Թրամփը Սիրիայի հյուսիս-արևելքում անցկացվող թուրքական ռազմական գործողության արդյունքում այս տարածաշրջանից դուրս էր բերել ԱՄՆ զորքերի մեծ մասը: Փոքրաթիվ ամերիկացի զինծառայողներ մնում են Սիրիայի հարավում և արևելքում, որտեղ, ըստ Պենտագոնի, նրանք օգնում են տեղի քրդական ուժերին նավթի հանքավայրերը հսկելու հարցում:
