Եվրոպան Հայաստանի ընկերն է, բայց այն ընկերը չէ, որն ի վիճակի է Հայաստանի համար կռվել: «Առաջին լրատվական»-ի հետ զրույցում գյումրեցի լրագրող, Մոլդովայի օգտին լրտեսության մեղադրանքով նախկինում դատապարտված, այժմ Մոլդովայում բնակվող Էռնեստ Վարդանյանը անդրադարձավ Ժնևում Ուկրաինայի հարցի շուրջ ծավալված քառակողմ բանակցություններին, որոնց արդյունքներով ձեռք է բերվել Ուկրաինայում լարվածության թուլացման շուրջ պայմանավորվածություն:
Նա նշեց, որ Ժնևի պայմանագիրը չի կարող որևէ կերպ կարգավորել, ուշքի բերել Ուկրաինայի բնականոն քաղաքական կյանքը, որովհետև Ուկրաինայի նոր ղեկավարությունն ի վիճակի չէ պահել պետությունը՝ տարբեր պատճառներով:
Ժնևի պայմանագրի հիման վրա բոլոր կողմերը կարողանում են իրենց հետաքրքրությունները պահպանել, բայց, իհարկե, տարբեր ուղղություններով, այսինքն՝ Ռուսաստանը որպես պատրվակ կօգտագործի այդ պայմանագիրը՝ իր ուժերը Հարավարևելյան Ուկրաինա տարածելու համար, իսկ ԱՄՆ-ն ու ԵՄ-ն կօգտագործեն դա՝ Ռուսաստանին մեղադրելու համար, թե՝ նա չի կատարում պայմանագրի հոդվածները: Ուստի նման պայմանավորվածությունը, նրա համոզմամբ, չի ծառայելու Ուկրաինայում ստեղծված ճգնաժամի կարգավորմանը:
«ԵՄ-ին վերաբերվում եմ սկեպտիկորեն, քանի որ Մոլդովայում Եվրոպայի դրոշի ներքո հանցագործություններ են կատարում երկրի ղեկավարները: Նրանք օգտագործում են եվրոպական կարգախոսներ, բայց դրանց հիման վրա կործանում են պետությունը, և ես վերջին երկու տարիների ընթացքում կորցրել եմ եվրոպական երազանքս, որովհետև տեսնում եմ, թե այստեղ ինչ է կատարվում: Չեմ ուզում, որ կեղծ եվրոպական լոզունգները դառնան նաև Հայաստանի քաղաքական ուղղությունը:
Ինձ համար եվրոպական արժեքները ոչ թե այսօրվա արժեքներն են, այլ 50-60 տարի առաջ Եվրոպայում գործող արժեքները, որոնք պաշտպանվել են Եվրոպայում: Ես ուզում եմ տեսնել հին Եվրոպան ու հին Եվրոպայի արժեքները:
Ներկայիս Եվրոպան արդեն այդ Եվրոպան չէ, այսօրվա կաշառակեր եվրոպական ղեկավարներն ինձ համար հեղինակություն չեն, և այսօրվա արժեքներն այն արժեքները չեն, որոնց մենք պետք է հետևենք»,- նման տեսակետ հայտնեց Էռնեստ Վարդանյանը:
Վերջինս ասաց, թե ինչ դասեր պետք է քաղի Հայաստանը ներկայիս Եվրոպայի քաղաքականությունից: Նրա համոզմամբ՝ պետք է հիշել, որ Եվրոպական միությունը լավ նպատակ է, բայց դա չի նշանակում, որ մենք պետք է ջնջենք մեր պատմության ազգային արժեքներն ու գնանք Եվրոպա՝ առանց վերլուծելու այդ ամենը: Պետք է հիշել, որ Եվրոպան երբեք մեզ համար իր գլուխը չի կոտրի թուրքերի և ադրբեջանցիների հետ:
«Ես որպես փաստ գիտեմ, որ Սերժ Սարգսյանը երկու տարի շարունակ եվրոպացիներին խնդրել է ճնշել Թուրքիայի ղեկավարությանը՝ բացելու համար հայ-թուրքական սահմանը, որը փակ է շուրջ 20 տարի: Եվրոպացիները չցանկացան, չկարողացան, և միևնույն է՝ սահմանը մնում է փակ, որը նշանակում է, որ Եվրոպան ի վիճակի չէ կամ չի ցանկանում մեզ համար որևէ խնդիր լուծել: Սա նշանակում է, որ Եվրոպան մեր ընկերն է, բայց այն ընկերը չէ, որն ի վիճակի է մեզ համար կռվել: Եվրոպան մեզ համար չի պայքարում: Սա պետք է գիտակցել քաղաքականություն կերտելիս»,- ասաց Էռնեստ Վարդանյանը:
